08 ستمبر 2010
نوسٹل ( مانیٹر نگ ڈیسک ) سوئٹزر لینڈ میں مساجد کی میناروں پر پابندی کا مطالبہ کرنے والی شدت پسند جماعت سینڑل ڈیموکریٹک یونین نے تیونس، مراکش اور کوسوو سے تعلق رکھنے والی تین مسلمان دوشیزاﺅں کی سوئس کاونٹی نوسٹل کے مقابلہ حسن میں شمولیت اور کامیابی پر شدید غم و غصے کا اظہار کیا ہے اور مقابلے کے نتائج کو تسلیم کرنے سے انکار کیا ہے۔پارٹی سے تعلق رکھنے والے رکن پارلیمان ایوان بیران نے مقابلے کے نتائج کو تسلیم کرنے سے انکار کرتے ہوئے انہیں یکسر مسترد کر دیا ہے۔ تینوں مسلمان دوشیزائیں مقابلہ حسن کی ٹاپ 12 شرکاءکے طور پر منتخب ہوئی ہیں۔ دائیں بازو سے تعلق رکھنے والی اسی جماعت نے سوئٹزر لینڈ میں مساجد کے میناروں کی تعمیر پر پابندی عائد کرنے کا مطالبہ کیا تھا۔ یہی جماعت ملک میں مسلمان اور عرب کیمونٹی کے خلاف حملوں کی وجہ سے بھی خاصی شہرت رکھتی ہے۔مقابلے میں انیس سالہ راسیہ الصمعی نے حسینہ نوسٹل کا خطاب حاصل کیا جبکہ سترہ سالہ مراکشی دوشیزہ ھدی صابر اور کوسوو کی انیس سالہ جینیتا حسناج مقابلے میں با الترتیب پہلے اور دوسرے نمبر پر آئیں۔سوئٹزر لینڈ سے شائع ہونے والے روزنامے "لی ماٹن" نے مقابلہ حسن میں تیونسی مسلمان دوشیزہ کی کامیابی پر تبصرہ کرتے ہوئے اس رائے کا اظہار کیا ہے کہ مقابلہ حسن میں شرکت کا دین سے کوئی تعلق نہیں۔ اخبار کی اس رائے کی شدید مذمت کی جا رہی ہے حالانکہ کامیاب ہونے والی دوشیزہ نے مستقبل میں وکالت کا پیشہ اختیار کرنے کی خواہش ظاہر کی ہے۔کوسوو کی رنر اپ حسینہ کا کہنا ہے کہ دین آپ کا ذاتی معاملہ ہو سکتا ہے۔ ہر شخص کسی نہ کسی عقیدے اور معیارات میں یقین رکھ سکتا ہے۔ جینیتا حسناج نے کہا کہ مقابلہ حسن میں دین کو شامل کرنا انتہائی افسوسناک بات ہے۔حسناج کا کہنا ہے کہ مقابلہ حسن میں شرکت کے حوالے سے خبر میں تین مسلمان دوشیزاوں کا ذکر کرنے کے بجائے یہ کہا جائے کہ تین خوبصورت لڑکیوں نے سوئس نوسٹل مقابلہ حسن جیت لیا تو بہتر ہوتا۔مقابلے میں نمایاں کامیابی حاصل کرنے والی مراکشی حسینہ ھدی صابر کا کہنا کہ ان کا مسلمان ہونا ان کے لباس اختیار کرنے اور زندگی گذارنے کی راہ میں رکاوٹ نہیں ہونا چاہئے۔

__________________
جاویداسد