80کی دہائی میں کہوٹہ ایٹمی تنصیبات کو نشانہ بنانے کے بھارتی و اسرائیلی منصوبے کا انکشاف

بھارت اور اسرائیل نے 1980ء کی دہائی میں کہوٹہ میں قائم ایٹمی تنصیبات کو نشانہ بنانے کا خفیہ منصوبہ بنایا تھا تاہم امریکی خفیہ ادارہ سی آئی اے کی جانب سے جنرل ضیاء الحق کو اطلاعات فراہم کرنے کے بعد اس منصوبہ پر عملدرآمد روک دیا گیا۔ یہ بات بھارتی اخبار ایشین ایج کی ایک رپورٹ میں کہی گئی ہے۔ اس رپورٹ میں دو تحقیقاتی رپورٹروں ایڈریان لیوی اور کیتھرین سکاٹ کلارک کی کتاب ”دھوکہ: پاکستان، امریکہ اور ہتھیاروں کی بین الاقوامی سازش“ کے حوالے دیئے گئے ہیں۔ کتاب کے مطابق اسرائیل اور بھارت نے 1983-84ء میں اسلام آباد کے قریب کہوٹہ میں قائم جوہری تنصیبات کو نشانہ بنانے کا خفیہ منصوبہ ترتیب دیا تھا تاہم امریکی انٹیلی جنس ایجنسی سی آئی اے کی جانب سے اس وقت کے صدر جنرل ضیاء الحق کو معلومات فراہم کرنے کے بعد بھارت اور اسرائیل نے یہ منصوبہ ترک کر دیا۔ مصنفین نے بھارت اور اسرائیل کے درمیان ایک ایسے وقت میں خفیہ روابط کا بھی انکشاف کیا ہے جب دونوں ممالک کے درمیان باضابطہ طور پر سفارتی تعلقات بھی قائم نہیں تھے۔ مصنفین کے مطابق فروری 1983ء میں جب حملے کا منصوبہ اگلے مراحل میں تھا، بھارت کے فوجی حکام نے کہوٹہ ریسرچ لیبارٹری کو تباہ کرنے کیلئے جدید جنگی آلات کی خریداری کیلئے خفیہ طور پر اسرائیل کا دورہ کیا تھا کیونکہ پاکستان کی ایٹمی تنصیبات کو ختم کرنا بھارت اور اسرائیل کا مشترکہ مفاد تھا۔ مصنفین نے انکشاف کیا ہے کہ 1983ء کے موسم خزاں میں پاکستان اٹامک انرجی کمیشن کے چیئرمین منیر احمد خان نے ویانا میں بھارت کے بھابا اٹامک ریسرچ سینٹر کے اس وقت کے ڈائریکٹر راج رمانا کو خبردار کرتے ہوئے واضح کیا تھا کہ اگر کہوٹہ پر حملہ کیا گیا تو اس صورت میں پاکستان ترامبے میں واقع بھارت کی جوہری تنصیبات کو نشانہ بنائے گا اور دھمکی کے بعد بھارت نے اپنے منصوبے پر عملدرآمد روک دیا۔ مصنفین کے مطابق اس مرحلہ پر اسرائیل نے بھارت کو تجویز پیش کی کہ کہوٹہ پر حملہ کیلئے ان کے لڑاکا طیارے بھارتی ریاست گجرات میں واقع جمانگر اور شمالی بھارت میں واقع ایک اور ایئربیس کو ایندھن بھرنے کیلئے استعمال کریں گے۔ کتاب میں انکشاف کیا گیا ہے کہ اس وقت کی بھارتی وزیراعظم اندرا گاندھی نے اسرائیلی قیادت میں کئے جانے والے مجوزہ آپریشن پر عملدرآمد کے حکم نامے پر دستخط کر دیئے تھے جس کے بعد پاکستان، بھارت اور اسرائیل کے درمیان جوہری تصادم کی صورتحال پیدا ہو گئی تھی۔

__________________