گرمیوں کے دوران کراچی میں روزانہ 4 مرتبہ ڈیڑھ گھنٹے لوڈشیڈنگ ہوگی
کراچی( طاہر عزیز/ اسٹاف رپورٹر) کراچی الیکٹرک سپلائی کارپوریشن کے پاس موسم گرما میں تمام ذرائع سے بجلی حاصل کرنے کے باوجود 450 سے 500 میگاواٹ کی کمی رہے گی جس کے باعث اس بار دن میں تین کے بجائے چار مرتبہ ڈیڑھ سے دو گھنٹے کی لوڈشیڈنگ ہوگی ، ذرائع کے مطابق موسم گرما میں شہر میں 2350 سے 2450 میگاواٹ بجلی کی ڈیمانڈ رہے گی اس وقت کے ای ایس سی کے پاس بجلی کی پیداوار 1500 میگاواٹ ہے اور ڈیمانڈ 1750 میگاواٹ ہے اس طرح ان دنوں شہر میں 250 میگاواٹ کی لوڈشیڈنگ جاری ہے۔ گرمیوں میں ڈیمانڈ 2350 اور 2450 کے درمیان رہے گی، اس طرح اوسطاً 5 سو میگاواٹ کی کمی کا کے ای ایس سی کو سامنا رہے گا۔ کے ای ایس سی ذرائع کا کہنا ہے کہ اس کمی کے باعث گزشتہ گرمیوں میں دن میں دو سے تین مرتبہ لوڈشیڈنگ کی جاتی تھی لیکن اس سال گرمیوں میں چار مرتبہ تک نوبت آسکتی ہے ، شہر میں ٹوٹل فیڈر 450 ہیں جس میں 100 کے قریب ایسے فیڈر ہیں جو ترجیحی لسٹ میں شامل ہیں اور انہیں بند نہیں کیا جاتا، بقیہ 850 فیڈر کو چار گروپ میں تقسیم کرکے لوڈشیڈنگ کی جاتی ہے۔ اس مرتبہ گرمیوں میں ایک وقت میں دو گروپ بند ہوا کریں گے اس طرح بیک وقت 40 فیصد شہر بند ہوا کرے گا ۔ دریں اثناء ذرائع نے بتایا کہ اتوار سے ڈیفنس ہاؤسنگ اتھارٹی کے پاور پلانٹ نے دوبارہ پیداوار شروع کر دی ہے اور کے ای ایس سی کو 30 سے 35 میگاواٹ دے رہا ہے ، واضح رہے یہ پلانٹ افتتاح کے اگلے دن ہی بند ہوگیا تھا، ادھر پیر کو بھی شہر میں دن اور رات کے اوقات میں مرحلہ وار ڈیڑھ ڈیڑھ گھنٹے کی لوڈشیڈنگ کا سلسلہ جاری رہا۔

__________________