راولپنڈی میں گزشتہ تین ماہ کے دوران ہونے والے سات خود کش حملوں اور بم دھماکوں کے واقعات میں سابق وزیر اعظم بے نظیر بھٹو اور سیکیورٹی فورسز و حساس اداروں کے 70 سے زائد اہلکاروں سمیت 103افراد جاں بحق اور 200 کے قریب زخمی ہو گئے ۔

گزشتہ سال 4 ستمبر سے رواں سال 4 فروری تک ہونے والے سات میں پانچ خود کش دھماکے دفتری اوقات کے دوران صبح سات بجے سے ساڑھے آٹھ بجے کے درمیان ہوئے 90 دنو ںمیں ہونے والے خود کش حملوں کی تفصیلات کے مطابق 4 ستمبر 2007 ء کو پہلا خود کش حملہ قاسم مارکیٹ کے قریب ایک حساس ادارے کی بس میں ہوا جس کے فوراً بعد دوسرا دھماکہ اسی روز تھانہ آر اے بازار کے قریب ٹی چوک میں ہوا ان حملوں میں مجموعی طور پر 38 افراد جاں بحق اور درجنوں زخمی ہو گئے تھے جبکہ قاسم مارکیٹ کے قریب خود کش حملے کا نشانہ بننے والی بس میں حساس ادارے کے 60 کے قریب ملازمین سوار تھے ۔

اسی طرح 30 اکتوبر 2007 ء کو دوسرا خود کش حملہ جہلم روڈ پر گالف کلب کے قریب حساس علاقے میں ہوا جس میں پانچ پولیس اہلکاروں سمیت سات جاں بحق اور 32 زخمی ہو گئے تھے 24 نومبر کو شمس آباد کے قریب حساس ادارے کے صدر دروازے پر حساس ادارے کی بس اور جی ایچ کیو کے گیٹ نمبر ایک پر یکے بعد دیگرے دو الگ الگ خود کش حملوں میں مجموعی طور پر 14 افراد جاں بحق اور درجنوں زخمی ہوئے تھے۔

شمس آباد کے قریب حساس ادارے کی جس بس کو حملے کا نشانہ بنایا گیا اس میں 60 کے قریب سرکاری ملازمین سوار تھے جبکہ آتش گیر حملے کے باعث پوری بس شدید آگ کی لپیٹ میں آ گئی تھی

27 دسمبر کو لیاقت باغ میں طاقتور خود کش حملے کے نتیجے میں سابق وزیر اعظم و پیپلز پارٹی کی چیئرپرسن محترمہ بے نظیر بھٹو سمیت 32 افراد جاں بحق اور 83 کے قریب زخمی ہو گئے تھے ۔لیاقت باغ کے قریب یہ خود کش حملہ شام 5 بجکر 12 منٹ پر اس وقت کیا گیا تھا جب بے نظیر بھٹو لیاقت باغ گراؤنڈ میں انتخابی جلسے عام سے خطاب کے بعد واپس روانہ ہو رہی تھیں ۔ اس طرح 4 فروری پیر کے روز این ایل سی کے گیٹ پر سرکاری بس کو خود کش حملے کا نشانہ بنانے کے نتیجے میں اطلاعات کے مطابق 10 افراد جاں بحق اور 27 زخمی ہو گئے