گلے شکوے ختم، 2سابق وزرائے اعظم شجاعت اور جمالی کی مکہ میں ملاقات
جدہ (شاہد نعیم/نمائندہ خصوصی) سابق وزرائے اعظم چوہدری شجاعت حسین اور میر ظفر اللہ خان جمالی کی مکہ مکرمہ میں 3گھنٹے طویل ملاقات ہوئی جس میں ملک کی موجودہ تشویش ناک صورتحال پر تفصیلی گفتگو ہوئی اور آئندہ کا لائحہ عمل طے کرنے پر غور کیا گیا۔ یہ ملاقات مکہ مکرمہ کے ایک ہوٹل میں ہوئی جہاں دونوں رہنما عمرہ کی سعادت حاصل کرنے کے بعد گرمجوشی کے ساتھ بغلگیر ہوئے اور کہا کہ پاکستان ایک ہے تو ہم کیوں نہیں ایک ہوسکتے۔ چھوٹی باتوں سے غلط فہمیاں پیدا ہوجاتی ہیں جسے دور کرنا ہمارا فرض بنتا ہے تاکہ پاکستان ایک مستحکم ملک بن سکے ۔ مصدقہ ذرائع نے بتایا ہے دونوں رہنماؤں نے پاکستان میں موجودہ حکومت کی صوبہ سرحد و شمالی علاقہ جات کی صورتحال، پاک، افغانستان سرحد کی تازہ ترین صورتحال کے علاوہ ججز کی بحالی، بجلی کا بحران ،غذائی اشیاء اور تیل کی قیمتوں میں اضافے پر بات چیت ہوئی۔ انہوں نے کہا پاکستان ہم سب کا ہے اور اس کا دفاع، اسے مستحکم بنانا ہم سب کی ذمہ داری ہے، پوری قوم کو آج اتحاد و یکجہتی کی ضرورت ہے۔ انہوں نے عوام پر زور دیا کہ وہ پاکستان کے استحکام کے لئے مل جل کر کام کریں تاکہ ملک میں ایک مضبوط جمہوریت قائم ہوسکے ۔

__________________