کراچی ... ملک کے مختلف علاقوں میں صنعتوں اور گھریلو صارفین کو گیس کی سپلائی میں تعطل سے رواں مالی سال کے لیے برآمدات کا ہدف حاصل نہیں ہو سکے گا۔ وفاق ایوان ہائے صنعت و تجارت کے نائب صدر زبیر طفیل کے مطابق گیس کی فراہمی بند ہونے سے پنجاب میں لاہور اور فیصل آباد کے اطراف قائم ٹیکسٹائل اور دیگر صنعتیں بری طرح متاثر ہوئی ہیں، جس کے باعث رواں مالی سال کے لیے برآمدی ہدف کا حصول ناممکن ہو جائے گا۔ انہوں نے بتایا کہ پچھلے سال گیس کی لوڈ شیڈنگ کا دورانیہ حتمی جب کہ لوڈ شیڈنگ مرحلہ وار تھی لیکن اب سوئی ناردرن گیس کمپنی لوڈ شیڈنگ کے خاتمے کی تاریخ نہیں بتا رہی۔ زبیر طفیل کے مطابق کراچی کی صنعتوں کو گیس پریشر کم ہونے کے باعث پیداواری عمل متاثر ہے۔انہوں نے امکان ظاہر کیا کہ ملک میں گیس کی طلب اوررسد میں عدم تواز ن پیدا ہو گیا ہے تاہم ایس ایس جی سی حکام کے مطابق سرد موسم کے باعث گیس کا پریشر کم ہو گیا ہے۔