حکومت نے نئے مالی سال میں70ارب روپے کے اضافی محصولات کےلئے تیل پر5 روپے لٹر پٹرولیم لیوی اور قدرتی گیس 5روپے فی یونٹ اضافی ایکسائز ڈیوٹی لگانے پرغورکررہی ہے۔انگریزی روزنامہ ڈان نے ایک سینئرسرکاری عہدیدارکے حوالے سے بتایا کہ وزارت خزانہ اور فیڈرل بورڈ آف ریونیونے وزارت پٹرولیم سے اس سلسلہ میں مذاکرات کرلئے ہیں انہوں نے کہا کہ پانچ مصنوعات پر پٹرولیم لیوی میں اضافہ سے 50 ارب جبکہ گیس مصنوعات پرفیڈرل ایکسائزڈیوٹی میں اضافہ سے 20ارب روپے اکٹھے ہونگے۔ذرائع کے مطابق سید نوید قمر کی قیادت میں وزارت پٹرولیم کی ٹیم نے ابتدائی رد عمل ظاہر کرکے اس تجویز کی مخالفت کی اور کہا کہ وزارت پہلے ہی عدلیہ کی وجہ سے دبائو میں ہے کہ عوام کو فائدہ پہچایاجائے اوریہ کہ عوام اس ٹیکس پر سخت ردعمل کااظہار کریں گے۔فی الوقت تمام پٹرولیم مصنوعات پر 16فیصد جنرل سیلز ٹیکس وصول کیا جارہا ہے اس کے علاوہ پٹرول لیوی 10روپے سے 14روپے فی لٹروصول کیا جاتا ہے مجوزہ اضافے کی صورت میں صارفین کو پٹرول پر فی لٹر15روپے ،ہائی اوکٹین پر 19روپے لٹر فکس پٹرولیم لیوی اداکرنا ہوگا۔اس وقت حکومت پٹرولیم مصنوعات سے ماہانہ 10ارب روپے حاصل کررہی ہے ورلڈبینک اور آئی ایم ایف کے مشورے پرمختلف اقسام کے ٹیکس لگانے پر غور کیا جارہا ہے تاکہ 70 ارب روپے کی اضافی رقم اکٹھی کی جاسکے نئے مالی سال کے بجٹ پر بینکوں سے رقوم نکلوانے پر ٹیکس دگنا کیا جارہا ہے آئی ایم ایف کی 1700ارب کے ریونیوکی شرط کو پورا کرنے کےلئے فیڈرل بورڈ آف ریونیو 130ارب کے ٹیکس کا ہد ف پورا کرنے کےلئے کوشاں ہے