لاہور (کورٹ رپورٹر)لاہور ہائیکورٹ نے نواز شریف اور شہباز شریف سمیت خاندان کے دیگر افراد کی جانب سے دائر پٹیشن پر نیب سے ان افراد کی ضبط شدہ جائیداد کا ریکارڈ طلب کرتے ہوئے سماعت یکم ستمبر تک ملتوی کردی ہے۔ لاہور ہائیکورٹ کے جسٹس اعجاز الاحسن اور جسٹس سید منصور علی شاہ پر مشتمل دو رکنی بنچ شریف خاندان کی جانب سے دائر پٹیشن کی سماعت کررہا ہے۔ درخواست گزار کے وکیل شاہد حامد نے عدالت کو بتایا کہ بارہ اکتوبر انیس سو ننانوے کے بعد نیب نے ان کی اربوں روپے کی جائیداد تحویل میں لے لی تھی۔درخواست میں کہا گیا ہے کہ سندھ ہائیکورٹ اور سپریم کورٹ ان کے خلاف مقدمات ختم کرچکی ہے لیکن جائیداد کے کاغذات اب بھی نیب حکام کے پاس ہیں اور اس بات کا خدشہ ہے کہ کاغذات کو غلط استعمال کرکے انہیں حراساں کیا جائے گا۔ایڈوکیٹ عارف عزیز شیخ نے عدالت کو بتایا کہ نیب کی جانب سے انہیں وکیل مقرر کیا گیا ہے کیس سے متعلق ریکارڈ اسلام آباد اور لاہور سے اکٹھا کرنا ہے اس لئے استدعا ہے کہ وقت دیا جائے، عدالت نے کیس کی سماعت یکم ستمبر تک ملتوی کردی ہے۔

__________________
جاویداسد