جنوبی افریقہ کی حکومت نے ملک میں ہاتھیوں کی بڑھتی ہوئی آبادی کے پیش نظر ان کے شکار پر عائد پابندی ختم کرنے کا فیصلہ کیا ہے۔
یہ پابندی سنہ انیس سو پچانوے میں عائد کی گئی تھی اور اب ہاتھیوں کی تعداد اس وقت کی تعداد سے دگنی سے بھی زیادہ ہوگئی ہے۔

جنوبی افریقی حکومت نے یہ اقدام جانوروں کے حقوق کی تنظیموں کے سخت احتجاج کے باوجود کیا ہے۔ ان تنظیموں کا کہنا ہے کہ اس پابندی کے خاتمے سے ہاتھیوں کے خاندان کے خاندان مارے جائیں گے۔

جانوروں کے حقوق کی تنظیموں کا کہنا ہے کہ ہاتھیوں کے مارنے کی کوئی سائنسی وجہ نہیں ہے اور اس پر عائد پابندی کو اٹھانے کے پیچھے تجارتی مقاصد ہیں۔تاہم حکومت کا کہنا ہے کہ ہاتھیوں کے شکار کی اجازت آخری حربے کے طور پر دی گئی ہے اور اس شکار کے لیے سخت شرائط بھی عائد کی گئی ہیں۔

جنوبی افریقہ کے صحافی ٹم نیری نے بی بی سی کو بتایا کہ ہاتھیوں کے پورے غول کو مارنا ہی بہتر ہے۔انہوں نے کہا کہ ماضی میں بڑے ہاتھیوں کی موت سے جوان ہاتھیوں کا رویہ خلاف معمول ہو جاتا تھا اور خصوصاً ان علاقوں میں جہاں خاندان پورا نہ ہوتا تھا اور جوان نر ہاتھی کے نہ ہونے سے ہاتھیوں اورگینڈوں کے باہمی رابطوں میں خلل آیا تھا۔

پارکوں کی منتظم تنظیم ساؤتھ افریقن نیشنل پارکس نے حکومت کو ہاتھیوں کے مارنے کی تجویز پیش کی تھی۔ ان کا کہنا ہے کہ پابندی اٹھنے کے باوجود فوری طور پر ہاتھیوں کو مارنے کا کوئی منصوبہ نہیں ہے۔

آبادی کم کرنے کے لیے ہاتھیوں کو ہلاک کرنے کے علاوہ دوسرے طریقوں میں ہاتھیوں کی نقل مکانی اور مانع حمل ادویات کا استعمال ہے۔ لیکن ٹم نیری کا کہنا ہے کہ یہ مہنگے اور مشکل طریقے ہیں۔

انہوں نے بی بی سی کو بتایا کہ نر ہاتھی کو آختہ کرنا آسان نہیں کیونکہ اس کے اندرونی خصیے ہوتے ہیں۔ انہوں نے مزید کہا کہ یہ آپریشن چار گھنٹے تک لے سکتا ہے اور اس دوران ہاتھی کو سیدھا کھڑا رکھنا ہوتا ہے۔دوسری طرف نقل مکانی کے لیے ان ہاتھیوں کو جہاز کے ذریعے منتقل کرنا پڑے گا۔

__________________