اسلام آباد ۔ پاکستان افغانستان کے لیے امریکا کے خصوصی نمائندے رچرڈ ہالبروک نے اسلام آباد میں ملاقات کے دوران امریکا پر کی جانے والی تنقید پر غصے میں آ کر ارکان پارلیمنٹ کو ڈانٹ پلا دی ۔ ملاقات کے بعد پیپلزپارٹی کی سیکرٹری اطلاعات فوزیہ وہاب نے کہاکہ ہالبروک گفتگو کے دوران طیش میں آ گئے ۔ مسلم لیگ ( ن ) کی رہنما تہمینہ دولتانہ نے بتایاکہ ہالبروک نے کہا کہ امریکا پاکستان کے لیے بہت کچھ کر رہا ہے لیکن پاکستان میں امریکا کے بارے میں تاثرات اچھے نہیں ہیں ۔ انہوںنے بتایا کہ انہوںنے ہالبروک سے کہا کہ امریکا کا تو ایک نائن الیون ہوا تھا جبکہ پاکستان میں تو روزانہ نائن الیون ہو رہا ہے ۔ اور پاکستان امریکی جنگ لڑ رہا ہے لیکن امریکی رویہ خود مختار پاکستان کے لیے درست نہیں ہے ۔ تہمینہ دولتانہ نے بتایا کہ اس پر ہالبروک تھوڑے گرم ہو گئے اور کہا کہ اگر پیسہ لینا ہے تو لیں جس میں بقول تہمینہ دولتانہ انہوںنے کہا کہ ہم عزت سے پیسہ لینا چاہتے ہیں اور خود مختاری میں رہنا چاہتے ہیں اور امریکا ہمارا دوست بنے آقا نہ بنے ۔

__________________
(اے پروردگار) ہم تیری ہی عبادت کرتے ہیں اور تجھ ہی سے مدد مانگتے ہیں