لاڑکانہ (بیورو رپورٹ)وزیراعلیٰ سندھ ڈاکٹر ارباب غلام رحیم نے کہا ہے کہ جن حکمرانوں نے بدعنوانیاں کرکے اپنے لئے بہت کچھ بنایا انہیں و طن کی مٹی بھی نصیب نہیں ہے۔ ہماری حکومت نے دیانتداری کی اعلیٰ مثالیں قائم کی ہیں، وہ بدھ کی سہ پہر لاڑکانہ کے قریب گوٹھ علی آباد میں صوبائی وزیر حاجی الطاف انڑ کی جانب سے دیئے گئے ظہرانے،محمد ایوب کھوڑو انجینئرنگ کالج کے سنگ بنیاد اور شیخ برادری کے استقبالئے سے خطاب کررہے تھے۔ انہوں نے کہا کہ ہماری حکومت میں اللہ کے فضل سے نحوست نہیں، سندھ کا بجٹ منافع کا بجٹ ہے ۔ انہوں نے کہا کہ انتخابات کے موقع پر ریلیوں اور جلسوں کے انعقاد کے سلسلے میں نئی پالیسی ترتیب دی جاری ہے تاکہ عوام کو درپیش خطرات پر قابو پایا جاسکے۔ انہوں نے کہا کہ لاڑکانہ میں مسلم لیگی امیدوار بھاری اکثریت سے کامیاب ہو کر ثابت کردیں گے کہ لاڑکانہ اب مسلم لیگ کا مضبوط مرکز بن چکا ہے۔ انہوں نے عوام سے اپیل کی کہ وہ اگر لاڑکانہ سے بدمعاشی اور جرائم کا خاتمہ چاہتے ہیں تو پھر ہمارے امیدواروں کو کامیاب بنائیں، انہوں نے کہا کہ حکومت سندھ اندرونِ سندھ دوسرے نمبر پر آنے والے اہم شہروں کی ترقی کے لئے عالمی بینک سے اربوں روپے کا قرضہ حاصل کیا جاہا ہے۔ انہوں نے کہا کہ لاڑکانہ میں انجینئرنگ کالج کے قیام پر چارسوملین روپے خرچ کئے جارہے ہیں، اس موقع پر خادم حسین شیخ نے مسلم لیگ ق میں شمولیت کا باضابطہ اعلان کرتے ہوئے وزیراعلیٰ کو شیخ برادری کے تعاون کا یقین دلایا۔

__________________