ہمپشائر کاؤنٹی ہسپتال میں2 خواتین کی ہلاکت کی تحقیقات شروع



لندن(جنگ نیوز ) رائل ہمپشائر کاؤنٹی ہسپتال میں ایک ہی دن بچوں کو جنم دینے والی دو خواتین کی زچگی کے بعد ایک ہی قسم کے انفیکشن سے ہلاکت کی تحقیقات شروع کردی گئی ہیں۔ یہ بات گزشتہ روز حکام نے بتائی ہے۔ استانیوں 39سالہ ایمی کیمنس اور 29سالہ جیسمین پکٹ نے ونچسٹر میں واقع ہسپتال میں کرسمس سے عین قبل ایک ہی دن بالترتیب ایک بچی اور ایک بچے کو جنم دیا تھا۔ ہسپتال سے ریلیز ہونے سے قبل یہ خواتین گروپ اے سٹریپ ٹوکوکل انفیکشن سے متعلقہ پیچیدگیوں کی وجہ سے چل بسی تھیں۔یہ انفیکشن سٹریپ اے کے نام سے مشہور ہے جو کہ سپربگ کے طور پر نہیں جانا جاتا۔ ہسپتال کی ابتدائی تحقیقات کے میں بتایاگیا تھا کہ ونچسٹر سے تعلق رکھنے والی کیمنس کو انفیکشن کی وجہ سے شدید دورے پڑے جس کی وجہ سے وہ کرسمس سے قبل ہلاک ہوگئی جبکہ ہمپشائر کے علاقے کولڈن کامن سے تعلق رکھنے والی پکٹ اچانک ہونے والے شدید نمونیہ سے 23دسمبر کوہلاک ہوگئی جس کے بارے میں کافی حدتک یہ بات یقینی ہے کہ اس نمونیہ کی وجہ بھی مذکورہ انفیکشن تھا۔دونوں بچے بالکل ٹھیک اور صحت مند ہیں۔ ہسپتال کے حکام نے گزشتہ روزاس بات کی تصدیق کی ہے کہ مذکورہ اموات کی فوری تحقیقات شروع کردی گئی ہیں اوراس سلسلے میں ہسپتال کے سٹاف کا ٹیسٹ بھی کیا جارہاہے تاکہ یہ پتہ چل سکے کہ کہیں ان کی وجہ سے تو یہ اموات نہیں ہوئیں۔