کراچی ( جنگ نیوز) لاہورمیں سردی بڑھ جانے کے باوجود جیو یکجہتی کیمپ کی رونقیں بحال رہیں،صوبائی دارالحکومت کے علاوہ دوردرازشہروں سے بھی لوگ یہاں آکراپنی عقیدتوں کے پھول نچھاورکرتے رہے،پیپلزپارٹی کی چیئرپرسن بینظیربھٹوکے شوہرآصف علی زرداری کی طرف سے ان کے سیکریٹری ڈاکٹر سومرو نے اظہارِ یکجہتی کیا۔ لاہورکے علاوہ ساہیوال،شیخوپورہ اوردوسرے شہروں سے وکلا اور سول سوسائٹی کے لوگ جیویکجہتی کیمپ میں آکر یکجہتی کااظہار کرتے رہے،سابق وزیراعظم بینظیربھٹوکے شوہرآصف علی زرداری نے اپنے سیکریٹری ڈاکٹر سومرو کے ہاتھ گلدستہ بھیجا۔ پیپلز پارٹی کی امیدوار شبینہ ریاض بھی گلدستہ لیکرظہاریکجہتی کیلئے کیمپ میں آئیں، ان افرادکا کہناتھا کہ جیوعوام کی آوازہے،جس نے ہمیشہ حق اورسچ کی بات کی ہے اور عوام میں شعور بانٹاہے،اس لئے جیوکی نشریات کیبل پربھی فوری طورپر بحال کی جائیں،کیمپ کے پاس سے گزرنے والے گاڑی اور موٹر سائیکل سوارافرادبھی وکٹری کے نشان بناکرجیو سے یکجہتی کااظہارکرتے رہے۔ڈاکٹر سومرو نے کہا کہ مجھے آصف زرداری نے بھیجا ہے کہ آپ جائیں اور جیو کے ساتھ اظہار یک جہتی کریں، ہمارا میڈیا کے ساتھ پرانا تعلق ہے اور ہم اس تعلق کو نبھائیں گے۔ شبینہ ریاض کا کہنا تھا کہ اللہ جیو کو جلدی بحال کرے، ہماری نیک خواہشات جیو کے ساتھ ہیں۔ شیخوپورہ ایسوسی ایشن انڈسٹری کے سیکریٹری منظور ملک نے کہا کہ جب تک آپ سوسائٹی میں آگاہی نہیں پیدا کریں گے، کچھ نہیں ہو سکتا اس لیے جیو کو جینے دیا جائے اور ہمیں بھی جینے دیا جائے۔

__________________