ہنگاموں کے دوران لوٹا گیا 50لاکھ روپے مالیت کا سامان برآمد، 82ملزمان گرفتار



کراچی (اسٹاف رپورٹر) کیپٹل سٹی پولیس کراچی ویسٹ زون نے گزشتہ دنوں یہاں ہونے والے ہنگاموں کے دوران لوٹا گیا 50 لاکھ روپے مالیت سے زیادہ کا سامان برآمد کر کے 82 افراد کو گرفتار کر لیا جن میں سے 54 ملزمان تھانہ سائٹ کی حدود سے گرفتار کئے گئے ہیں، یہ بات ڈی آئی جی ویسٹ زون کیپٹن (ر) فلک خورشید نے جمعہ کو سائٹ تھانے میں ایک پریس کانفرنس کے دوران بتائی۔ فلک خورشید نے بتایا کہ پیر آباد تھانے کی حدود میں مختلف فیکٹریوں سے لوٹی گئی ڈائیاں اور ڈنر سیٹ وغیرہ جن کی مالیت 20 لاکھ روپے بنتی ہے برآمد کیا گیا، بلدیہ ٹاؤن میں ایک فیکٹری سے لوٹے گئے 5 سے 7 لاکھ روپے مالیت کے موٹر سائیکل رم برآمد کر لئے گئے سائٹ تھانے کی حدود میں لوٹے گئے لاکھوں روپے مالیت کے بینکوں کے کمپیوٹر اور کے ای ایس سی کے کیبل برآمد کر لئے گئے۔ ڈی آئی جی نے بتایا کہ مزید سامان کی برآمدگی اور ملزمان کی گرفتاری کے لئے پولیس چھاپے مار رہی ہے۔