ہنگاموں کے دوران نقصان کا سروے جاری، کیماڑی ٹاوٴن کا دفتر محفوط جگہ منتقل کرنے کا فیصلہ



کراچی(اسٹاف رپورٹر) نگراں صوبائی وزیر بلدیات ،کچی آبادی وخصوصی ترقیات سید سلیم احمد زیدی نے 27دسمبر کو شرپسندوں کے ہاتھوں جلائے جانے والے کیماڑی ٹاؤن کے دفاتر کادورہ کیا۔ٹاؤن ناظم ہمایوں محمد خان بھی موجودتھے۔ نگراں صوبائی وزیر نے اس موقع پر کہا کہ 27دسمبر کے بعد ہونے والے ہنگاموں میں صرف کراچی میں کئی ارب روپے کانقصان ہوا اور متعدد قیمتی انسانی جانیں ضائع ہوئیں اس لئے ان میں ملوث افراد کسی قسم کی نرمی کے حقدار نہیں اور انہیں قرار واقعی سزادی جائے گی۔انہوں نے کہا کہ جلاؤگھیراؤ اور ہنگاموں کے دوران ہونے والے نقصانات کے سروے کا کام تیزی سے جاری ہے جس کے بعد متاثرہ افراد اور خاندانوں کو معاوضہ کی ادائیگی کی جائے گی۔انہوں نے کہا کہ ہنگاموں کے ذمہ دار قوم کے مجرم ہیں کیونکہ انہوں نے ذاتی مقاصد کیلئے لوٹ مار کی اورمعصوم قیمتی انسانی جانوں کوموت کے گھاٹ اتارا۔انہوں نے کہا کہ بلدیاتی ادارے عوام کو بنیادی سہولتیں فراہم کرنے والے ادارے ہیں اس لئے انہیں تباہ کرنے اور آگ لگانے والے کسی طرح بھی عوام کے مفادات کے تحفظ کادعویٰ نہیں کرسکتے۔انہوں نے ٹاؤن میونسپل آفیسر کیماڑی کو ہدایت کی کہ دفاتر کوپہنچنے والے نقصانات کا تخمینہ لگاکر معاوضہ کیلئے سمری تیار کی جائے تاکہ اس ضمن میں گورنر سندھ اور وزیراعلیٰ سندھ سے منظوری حاصل کی جاسکے کیماڑی ٹاؤن آفس کی محفوظ جگہ منتقلی کی تجویز پر انہوں نے ٹی ایم او کو اس ضمن میں مناسب جگہ کی نشاندہی کرنے کی بھی ہدایت کی۔ ٹی ایم او طارق حسین گھلو نے صوبائی وزیر کو یقین دلایا کہ اس ضمن میں دو روز کے اندر تفصیلی رپورٹ تیارکرکے صوبائی وزیر کے دفتر بھیج دی جائے گی۔ اس موقع پر اسپیشل سیکریٹری ٹیکینکل لئیق احمد، اسپیشل سیکریڑی بلدیات مختار سومرو، ڈائریکٹر جنرل لوکل گورنمنٹ کمیشن خورشید نعیم ملک اور دیگر متعلقہ افسران بھی صوبائی وزیر کے ہمراہ تھے۔