شیخوپورہ (نمائندہ) یورپی یونین کے پاکستان آئے ہوئے دو مبصرین مسٹر برائنٹ اور مسٹر ٹیسلر نے شیخوپورہ کا دورہ کیا اور 18 فروری کو ہونے والے عام انتخابات کے انتظامات کا جائزہ لیا۔ مبصرین نے ڈی سی او سلمان اعجاز ڈی پی او منیر احمد چشتی ڈسٹرکٹ ریٹرننگ آفیسر رانا زاہد محمود اور اسسٹنٹ الیکشن کمشنر چوہدری ماجد شریف سے ملاقات کی۔چوہدری ماجد شریف نے انہیں بریفنگ دیتے ہوئے بتایا کہ الیکشن کے انتظامات مکمل ہیں اور الیکشن شفّاف اور منصفانہ کروائے جائیں گے۔ مبصرین نے اسسٹنٹ الیکشن کمشنر کے آفس کے دورہ کے دوران بیلٹ بکسوں کا معائنہ بھی کیا اور ان سے استفسار کیا کہ اگر پولنگ ا سٹاف میں خواتین افسروں اور ملازمین کی کمی ہو جائے تو کیا لائحہ عمل اختیار کیا جائے گا۔ جس پر اے ای سی نے بتایا کہ ضلع شیخوپورہ میں خواتین اسٹاف کی کمی نہیں ہے، اگر ایسا ہو جائے تو زنانہ پولنگ اسٹیشنوں پر مرد پریذائیڈنگ آفیسر تعینات کئے جا سکتے ہیں مگر اسسٹنٹ پریذایڈنگ آفیسر اور پولنگ آفیسر خواتین اسٹاف میں سے لئے جائیں گے۔