یورپی یونین کے مبصرین کی فاروق ستار اور ارکان رابطہ کمیٹی سے ملاقات
کراچی (پ ر) پاکستان میں 18 فروری کے عام انتخابات کا جائزہ لینے والے یورپی یونین کے مبصرین کے دو رکنی وفد نے آج ایم کیو ایم کے مرکز نائن زیرو پر رابطہ کمیٹی کے ارکان اور ایم کیو ایم کی ڈپلومیٹک کمیٹی کے ارکان سے ملاقات کی۔ ملاقات دو گھنٹے سے زائد وقت تک جاری رہی وفد یورپین الیکشن آبزرویشن مشن کے چیف آبزرو مائیکل گہلر (Mr. Michale Gahler) اور ڈپٹی آبزرور مس بینا رابرٹس (Ms.Hannah Roberts) پر مشتمل تھا۔ ملاقات میں رابطہ کمیٹی کے رکن شعیب بخاری ایڈووکیٹ اور ایم کیوایم کے ارکان قومی اسمبلی حیدر عباس رضوی، محترمہ خوش بخت شجاعت، محترمہ فوزیہ اعجاز، سندھ اسمبلی میں ایم کیوایم کے پارلیمانی لیڈر سید سردار احمد ، ڈپٹی پارلیمانی لیڈر فیصل سبزواری، ارکان سندھ اسمبلی عسکری تقوی، رضا ہارون، نادیہ گبول اورسٹی نائب ناظمہ کراچی محترمہ نسرین جلیل شریک تھیں۔ یورپی یونین کے وفد نے متحدہ قومی موومنٹ کے رہنماؤں سے پاکستان میں ہونے والے عام انتخابات اور ملک خصوصاً سندھ کی سیاسی صورتحال اور دیگر امور پر تبادلہ خیال کیا۔ وفد نے عام انتخابات کے بارے میں اپنی حتمی رپورٹ سے بھی ایم کیو ایم کے رہنماؤں کو آگاہ کیا ملاقات کے بعد میڈیا کو بریفنگ دیتے ہوئے ڈاکٹر فاروق ستار نے کہا کہ ہم نے یورپی مبصرین کی توجہ بعض اخبارات میں شائع ہونے والی یورپی یونین کی جائزہ رپورٹ میں ایم کیو ایم کے حوالے سے غیر مناسب الفاظ استعمال کرنے کی جانب بھی مبذول کرائی اور اس کو سراسر غلط اور بے بنیاد قرار دیا ہے جس پر یورپی یونین کے چیف آبزرور مائیکل گہلر نے واضح کیا کہ ان کی رپورٹ کو بعض اخبارات نے سراسر غلط انداز میں پیش کیا ہے۔ یورپی مبصرین نے ایم کیو ایم کے رہنماؤں کو یقین دلایا کہ وہ اس بات کی اپنی جانب سے بھی مزید وضاحت کریں گے اور اس سے لاتعلقی کا اظہارکریں گے۔ ڈاکٹر فاروق ستار نے کہا کہ الیکشن کمیشن کی غیر جانبدارانہ تشکیل نو ہو یا انتخابی فہرستوں کا معاملہ یا پھر انتخاب کے حوالے سے پیدا ہونے والی شکایات کا نظام اس حوالے سے اصلاحات ضروری ہیں اور ایسا جتنا جلد ہوگا وہ ملک میں انتخابی عمل جمہوریت اور جمہوری اقدار کیلئے فائدہ مند ثابت ہوگا۔ انہوں نے کہا کہ یورپی مبصرین سے ہماری بات چیت خوشگوار ماحول میں ہوئی ہے۔

__________________