کراچی (رپورٹر۔افضل ندیم)
کراچی کے مختلف علاقوں میں اسٹریٹ کرائم کے دوران مسلح افراد کی فائرنگ سے ایک شخص ہلاک اور ایک لڑکی سمیت چھ افراد زخمی ہوگئے۔پولیس کے مطابق کورنگی کے قریب لوٹ مار کرنے والے مسلح افراد نے موٹر سائیکل سوار پچاس سالہ محمد شیخ کو رکنے کا اشارہ کیا۔اس کے نہ رکنے پر انہوں نے فائرنگ کی جس سے محمد شیخ شدید زخمی ہو گیا اس کے بیٹے نے اسے اسپتال پہنچانے کی کوشش کی تاہم وہ طبی امداد ملنے سے قبل ہی ہلا ک ہوگیا۔ کورنگی سے ڈیفنس آنے والی منی بس میں مسلح ملزمان نے لوٹ مار کی اس دوران مسافروں کی مزاحمت پر ملزمان کی فائرنگ سے ایک شخص زخمی ہوا ۔ بلوچ کالونی پل کے قریب ڈاکوؤں کی فائرنگ سے ایک شخص اور مچھر کالونی کے مکان میں لوٹ مار کے دوران ملزمان کی فائرنگ سے اٹھارہ سالہ لڑکی زخمی ہوگئی۔ قائد آباد کے علاقے اولڈ مظفر آباد کالونی میں ملزمان کی فائرنگ سے دو بھائی اور بلدیہ ٹاؤن میں ڈکیتی کے دوران ملزمان کی فائرنگ سے ایک نوجوان زخمی ہوا۔