کراچی (اسٹاف رپورٹر) کراچی میں 2007ء میں اغوا برائے تاوان کے 91 مقدمات درج کئے گئے جس میں 73 افراد کو اغوا کیا گیا جس میں با اثر شخصیات کے اسکول کے بچے بھی شامل تھے ۔ اینٹی وائینلٹ کرائم یونٹ نے 62 مغویوں کو بازیاب کرالیا جبکہ ایک مغوی کے بارے میں ابھی تک کچھ معلوم نہیں ہوسکا ہے ۔ 26 مغوی تاوان ادا کر کے رہا ہوئے ۔ 36 مغویوں کو بغیر تاوان کے اے وی سی سی نے بازیاب کرایا۔ اس دوران دس اغوا کرنے والے ملزمان مقابلے میں ہلاک ہوئے جبکہ 119 اغوا برائے تاوان کے ملزمان کو گرفتار کیا گیا۔ شہر میں اغوا برائے تاوان کے 30 ملزمان ایسے ہیں جنہیں گرفتار کیا گیا۔ انہوں نے مختلف گینگ بنائے ہوئے تھے اور 27 ملزمان ایسے اے وی سی سی نے گرفتار کئے جنہوں نے از خود تین چار لوگوں کو ملا کر گروہ بنایا اور انہوں نے پڑوسی کے بچے یا فیکٹری کے مالک اس کے بیٹے کو اغوا کیا، بعدازاں اس سے تاوان وصول کرنے کی کوشش کی تو اے وی سی سی کی ٹیم نے انہیں تاوان وصول کرتے ہوئے رنگے ہاتھوں گرفتار کیا۔ اے وی سی سی کی ٹیم نے اغوا برائے تاوان کے سب سے بڑے ملزم معشوق بروہی کو دیگر اداروں کے ہمراہ مل کر ہلاک کیا جبکہ دوسرے خطرناک ملزم سلطان زیب کو کورنگی انڈسٹریل ایریا سے اغوا کیا۔ یہ ملزمان اپنے دیگر ساتھیوں کے ہمراہ مل کر صنعتکاروں کے بچوں کو اسکولوں کے قریب سے اغوا کرتے تھے بعدازاں ان سے بھاری تاوان وصول کرتے تھے جبکہ دوسرا خطرناک ملزم میاں بخش کھوسو کو کشمور سے گرفتار کیا اور ایک ملزم قاری یاسین کو کراچی سے گرفتار کیا جبکہ مجید اسپیڈ کو لیاری میں اس کے ساتھیوں نے ہلاک کیا۔ اے وی سی سی کے ایس ایس پی فاروق اعوان کے مطابق اغوا برائے تاوان کے 70فیصد کیسز کو حل کرلیا گیا ہے اور خطرناک ملزم معشوق بروہی کے سر کی قیمت 25لاکھ روپے تھی۔