پارہ چنار۔۔۔۔۔۔۔ کرم ایجنسی میں نئے سال کے آغاز پر بھی لڑائی جاری ہے اور لڑائی کے دسویں روز7افراد ہلاک اور9 زخمی ہو گئے جبکہ ہنگو اور اورکزئی کے عمائدین پرمشتمل امن جرگے نے فریقین سے دو الگ الگ مقامات پرمذاکرات کا آغازکردیا ہے۔تفصیلات کے مطابق کرم ایجنسی میں متحارب فریقین کے درمیان ہلکے اور بھاری ہتھیاروں سے لڑائی جاری ہے اورتازہ جھڑپوں میں گاؤں غربینہ میں میزائل گھر پر گرنے سے ایک شخص ہلاک جبکہ مختلف علاقوں میں9 افراد زخمی ہوگئے جبکہ ابراہیم زئی میں گولہ گرنے سے6افراد ہلاک ہوگئے ۔دوسری جانب اضلاع پایاں سے آنے والے جرگہ ارکان کو فوج کی نگرانی میں ایک متحارب فریق سے مذاکرات کیلئے صدہ پہنچا دیا گیاہے۔ کرم ایجنسی کے6 قبیلوں مسوزئی ،علی شیرزئی ، پاڑہ چمکنی، بنگش ، زہمشت اور منگل  مقبل نے حکومت کے اس اقدام کو سراہا ہے تاہم انہوں نے پُرزور مطالبہ کیا ہے کہ فوری طور پر کیمپ میں خیموں اشیائے خوردو نوش اور دوسری چیزوں کا انتظام کیا جائے۔