لندن(سٹاف رپورٹر) ہوم آفس نے ویزا کے قانون میں تبدیلیوں کا اعلان کردیاہے اور آئندہ یورپی یونین سے باہر کے ملکوں کے سیاحوں اور رشتہ داروں سے ملنے کے لیے آنے والوں کو چھ ماہ کی بجائے تین ماہ کا ویزا دیاجائے گا، ہوم آفس برطانیہ بھی ان خاندانوں سے جو رشتہ داروں کو سپانسر کریں گے ایک ہزار پونڈ تک کی گارنٹی بھی طلب کرے گا جو اس بات کی ضمانت ہے کہ متعلقہ شخص ویزا کی معیاد ختم ہونے پر واپس چلاجائے گا، اور جو افراد واپس نہیں جائیں گے بانڈ ضبط کرلیاجائے گا حکومت چاہتی ہے کہ ویزا حاصل کرنے والے ضوابط کی پابندی کریں اور اوور ٹیسنگ یا وزیٹر کے غیر قانونی تارکین وطن بننے کے خلاف کریک ڈاؤن کیا جاسکے، ان تبدیلیوں کا اعلان ایک مشاورتی دستاویز میں شامل ہے ، جو گذشتہ روز ایک پریس کانفرنس میں جاری کی گئی، حکومت اولمپکس2021ء یا اسی طرح کے دوسرے مقابلوں کے لیے سپیشل ویزا بھی شروع کررہی ہے جو صرف ایک ہی مقابلہ کے لیے ہوگا، جبکہ مخصوص بزنس ویزا بھی متعارف کیاجاسکتاہے، پریس کانفرنس سے خطاب کرتے ہوئے امیگریشن کے وزیر لیام بائرین نے کہاکہ حکومت چاہتی ہے کہ سسٹم محفوظ ہو اور یہ تھی کی جائے کہ یوکے سیاحوں کے لیے مقبول منزل ہے، حکومت پہلے ہی وزیٹرز کے لیے فنگر پرنٹ اور بائیو میٹرک تفصیلات جمع کر رہی ہے اور اب تک ایک ملین فنگر پرنٹ بیرون ملک جمع کیے گئے ہیں، بیرون ملک سے آنے والے سیاحوں نے 15.4 بلین پونڈ کی رقم خرچ کی اور ٹورازم انڈسٹری میں اب 1.4 ملین افراد کام کرتے ہیں لیام بائرین نے کہاکہ اب تک 120 ممالک میں ویزا کی درخواست دینے والوں کو فنگر پرنٹ دینا پڑتے ہیں، بائیو میٹرک پڑتال سے10 ہزار افراد کی نشاندہی ہوچکی ہے،جنہوں نے امیگریشن یا سیاسی پناہ کے درخواستیں دی تھیں، 2008 سے پوری دنیا میں وزیٹرز کے فنگر پرنٹ لیے جائیں گے لیکن جوائنٹ کونسل فار دی ویلفیئر آف امیگرنٹس نے ان تجاویز پر تنقید کی ہے اور کہاکہ اس سے برصغیر پاک بھارت اور افریقہ کے لوگوں کے ساتھ امتیاز برتا جائے گا، اس سے غریب خاندانوں کے لیے بھی مشکلات پیدا ہوں گی، ہوم افیئرز کی سیلیکٹ کمیٹی کے چیئرمین کیتھ واز نے کہاکہ کیش گارنٹی قابل قبول ہے، لیکن اصل مسئلہ ثقافتی ہے اور وہ یہ کہ وزیٹر محض شادیوں کی تقریبات کے لیے نہیں آتے، مثلاً ان کے لیسٹر کے حلقے میں شادی کے لیے صرف ایک شخص نہیں بلکہ درجنوں آتے ہیں اور ایک ہزار پونڈ فی کس ضمانت بھاری رقم بن جاتی ہے، وہ اصول کے خلاف نہیں لیکن اس سے پیدا ہونے والی مشکلات زیر غور لانے کی ضرورت ہے۔