درجہ بندی: (1 votes - 5.00 average)

کوئٹہ ۔۔۔۔۔۔۔۔ بلوچستان کے علاقے ڈیرہ بگٹی میں تین گیس لائنوں کو دھماکوں سے اڑا دیا گیا ہے جبکہ سوئی میں ایسی ایک کوشش ناکام بنا دی گئی۔ بلوچ لبریشن آرمی نے دھماکوں کی ذمہ داری قبول کرلی ہے ۔ واقعہ کے بعد سیکورٹی فورسز نے چھاپے مار کر کئی افراد کو گرفتار کرلیا۔ دوسری جانب بلوچ لبریشن آرمی نے کوہلو اور ڈیرہ بگٹی کے گاؤں لنڈی میں مری قبیلے کے علاقے میں سیکورٹی فورسز کی کارروائی میں ایک بچے اور دو خواتین سمیت 7 افراد کی ہلاکت کا دعویٰ کیا ہے۔ دعوے کے مطابق ساتوں افراد کا تعلق ایک ہی خاندان سے تھا۔ سرکاری سطح پر ہلاکتوں کی تصدیق نہیں ہوسکی۔ تفصیلات کے مطابق بلوچستان کے علاقہ ڈیرہ بگٹی میں نامعلوم افراد نے تین گیس پائپ لائنوں کو دھماکوں سے اڑا دیا ۔کے مطابق نامعلوم افراد نے پیر کوہ سے سوئی جانے والی چھبیس انچ قطر کی پائپ لائن، زین کوہ سے سوئی جانے والی چوبیس انچ قطر کی پائپ لائن اور سوئی میں ایک چھوٹی پائپ لائن کو دھماکوں سے اڑا دیا ہے جس سے گیس کی ترسیل مقامی سطح پر متاثر ہوئی ہے۔ پولیس اہلکاروں نے بتایا ہے کہ سوئی میں ایک گیس پائپ لائن کو دھماکے سے اڑانے کی کوشش ناکام بنا دی ہے۔ پولیس کے مطابق ایک مشتبہ شخص نے گیس پائپ لائن کے ساتھ دھماکہ خیز مواد نصب کیا تھا جسے ناکارہ کردیا گیا ہے۔ ایسی اطلاعات بھی ہیں کہ پولیس نے ڈیرہ بگٹی میں بڑے پیمانے پر گرفتاریاں کی ہیں۔ دریں اثنا اپنے آپ کو کالعدم تنظیم بلوچ لبریشن آرمی کا ترجمان ظاہر کرنے والے سرباز بلوچ نامی شخص نے ٹیلیفون پر ان دھماکوں کی ذمہ داری قبول کی ہے۔ اس کے علاوہ کوہلو اور ڈیرہ بگٹی کے گاؤں لنڈی میں سیکورٹی فورسز نے ایک کارروائی کی ہے جس میں مقامی لوگوں کے مطابق ایک بچہ اور دو خواتین سمیت 7 افراد ہلاک ہوئے ہیں۔ بی ایل اے کے مطابق دو روز قبل علاقے میں ق لیگ کے امیدوار کے رشتہ داروں پر حملے کے بعد سیکورٹی فورسز نے مری قبیلے کے علاقے میں کارروائی کی ہے اور ایک ہی گھرانے کے سات افراد کو ہلاک کردیا ہے۔ سرکاری سطح پر ا س واقعہ کی تصدیق نہیں ہوسکی۔ مری اتحاد کے ترجمان نے اس واقعے کی مذمت کی ہے اور کہا کہ بلوچستان سمیت ملک بھر میں بلوچوں نے عید انتہائی سادگی سے منائی ہے اور عید کی نماز کے بعد بالاچ مری کے لیے دعا کی گئی ۔