ایران کے صدر محمود احمدی نژاد نے کہا کہ پاکستان، بھارت اور ایران کے ماہرین آئندہ پینتالیس دنوں میں تینوں ملکوں کے درمیان گیس پائپ لائن منصوبے کو حتمی شکل دے دیں گے۔
بھارت کے وزیر اعظم من موہن سنگھ سے نئی دہلی میں تین گھنٹے طویل ملاقات کے بعد ایک پریس کانفرنس سے خطاب کرتے ہوئے ایران کے صدر محمود احمدی نژاد نے کہا کہ تمام مسائل کے باوجود اس معاہدے کو پائے تکمیل تک پہنچایا جائے گا۔

انہوں نے کہا کہ تین ملکوں کے ماہرین اس منصوبے کے تمام تصفیہ طلب مسائل کو حل کر کےسفارشات اپنی اپنی حکومتوں کو پیش کریں گے۔

اس موقع پر بھارت کے سیکریٹری خارجہ شیو شنکر مینن نے بھی امید ظاہر کی کہ تمام مسائل کے باوجود گیس پائپ لائن کے منصوبے پر معاہدہ ہو جائے گا۔

شیو شنکر مینن نے کہا کہ اس منصوبے کے کئی پہلوں پر غور کرنے کی ضرورت ہے اور بہت سے نکات پر تصفیہ ہونا ہے لیکن اس منصوبے پر عملدرآمد ہو سکتا ہے۔

چین کو بھی اس منصوبے میں شامل کرنے کے حوالے سے ایک سوال کے جواب میں ایران کے صدر محمود احمدی نژاد نے کہا کہ یہ چین کو اس منصوبے میں شامل کرنے کی تجویز ان کی پاکستان کے حالیہ دورے کے دوران سامنے آئی ہے۔

انہوں نے کہا کہ اس تجویز کے تمام پہلوں پر غور کرنے کے بعد اس سلسلے میں کوئی فیصلہ کیا جائے گا۔

محمود احمدی نژاد نے بھارتی وزیر اعظم سے تین گھنٹے طویل ’ون ٹو ون‘ ملاقات کے بعد بھارت کی صدر پرتیبھا پاٹل سے بھی ملاقات کی۔

امریکہ کے بارے میں ایک سوال پر انہوں نے کہا کہ امریکہ ایک زوال پذیر طاقت ہے اور وہ پہلے جیسی عالمی طاقت نہیں رہی۔

انہوں نے کہا کہ ایران امریکہ کی دھمکیوں سے کسی طرح مرعوب نہیں ہوتا۔ ایران پر امریکہ ے ممکنہ حملے کے سوال پر انہوں نےکہا کہ امریکہ ایران پر حملہ نہیں کر سکتا اب اس میں اتنی طاقت باقی نہیں رہی ہے۔ انہوں نے کہا کہ امریکہ خود منہ چھپا رہا ہے اور اس کے حق میں یہی اچھا ہے کہ وہ جتنی جلدی ہو اس خطے سے نکل جائے۔

محمود احمدی نژاد نے ایک اور سوال پر ڈالر کے بارے میں کہا کہ یہ اپنی تمام قدر کھو بیٹھا ہے۔ انہوں نے کہا کہ ڈالر کی حیثیت کاغذ کے ٹکڑے سے زیادہ باقی نہیں رہی ہے۔

ایران پر عراق میں مداخلت کرنے اور حزب اللہ کو اسلح فراہم کرنے کے بارے میں ایک سوال پر انہوں نے کہا کہ ایران پر لگائے جانے والے یہ الزامات بے بنیاد ہیں۔

__________________