بنگلہ دیش کی وزیر اعظم شیخ حسینہ نے کہا ہے کہ وہ بھارت کے ساتھ بہتر تعلقات چاہتی ہیں تاکہ جنوبی ایشیا میں امن قائم رہے۔

بنگلہ دیش کی وزیر اعظم شیخ حسینہ نے یہ بات بھارت کے اپنے تین روزہ دورے کے پہلے دن کہی۔

پیر کو انہوں نے بھارت کی صدر پرتبھا پاٹل سے ملاقات کی۔

اطلاعات کے مطابق ملاقات کے دوران سکیورٹی اور شدت پسندی جیسے موضوعات پر بات چیت ہوگی اور دونوں ممالک کے درمیان سرمایہ کاری اور تعاون بھی بات چیت کا اہم موضوع ہوں گی۔

شیخ حسینہ نے کہا ’میں اپنے ملک کی عوام کے نیک جذبات لے کر بھارت آئی ہوں۔ ہندوستان ہمارا پرانا دوست ہے۔ ہم ہندوستان اور جنوبی ایشیا میں دوستی اور تعاون کا رشتہ چاہتے ہيں تاکہ ہم اپنے سب سے بڑے دشمن یعنی غریبی کا مل کر سامنا کر سکیں‘۔

شیخ حسینہ اتوار کی رات دارالحکومت دلی پہنچیں ہیں اور اس تین روزہ دورے کے دوران وہ اعلٰی حکام کے علاوہ بھارتی صنعت کاروں سے بھی ملاقات کریں گی۔

میں اپنے ملک کی عوام کے نیک جذبات لے کر بھارت آئی ہوں۔ ہندوستان ہمارا پرانا دوست ہے۔ ہم ہندوستان اور جنوبی ایشیا میں دوستی اور تعاون کا رشتہ چاہتے ہيں تاکہ ہم اپنے سب سے بڑے دشمن یعنی غریبی کا مل کر سامنا کر سکیں۔

شیخ حسینہ

اس دورے پر شیخ حسینہ کو اندرا گاندھی شانتی اعزاز سے بھی نوازا جائے گا۔

تیرہ جنوری کو بنگلہ دیشی وزیر اعظم اجمیر جائے گی اور اسی دن وہ ڈھاکہ کے لیے روانہ ہونگی۔

نئی دلی میں ایک پریس کانفرنس میں بھارتی خارجہ سیکرٹری نروپما راؤ نے کہا کہ بنگلہ دیش کی وزیر اعظم کے بھارت کے دورے سے دونوں ممالک کے رشتے مزید بہتر ہوں گے۔ ان کا مزید کہنا تھا کہ ’ہندوستان بنگلہ دیش کی حکومت کے ساتھ مل کر کام کرنے کے لیے پکا ارادہ رکھتا ہے‘ ۔

بی بی سی کے نامہ نگاروں کا کہنا ہے کہ اس دورے کے دوران ہندوستان اور بنگلہ دیش کی حکومتیں ایک درجن سے زائد معاہدوں پر دستخط کریں گے۔

خارجہ سیکرٹری نروپما را‎ؤ نے بتایا کہ اس دورے کے دوران جن اہم معاہدوں پر دستخط ہونگے ان میں مجرمانہ معاملات پر باہمی قانونی مدد، قصوروار افراد کو ایک دوسرے حوالے کرنا، عالمی دہشت گردی، بہتر اقتصادی روابط اور بجلی کے شعبے میں تعاون اہم ہیں۔

بی بی سی اردو

__________________
محتاج اصلاح و دعا