سعودی حکومت کا کہنا ہے کہ اس نے شدت پسندوں کے ایک ایسے گروہ کو گرفتار کیا ہے جو حج کے دوران متبرک مقامات پر حملوں کی منصوبہ بندی کر رہا تھا۔
اگرچہ اس بارے میں بہت کم تفصیلات جاری کی گئی ہیں، تاہم خیال کیا جاتا ہے کہ خانہ کعبہ اور مکہ مکرمہ میں واقع دیگر مقامات ان شدت پسندوں کا نشانہ نہیں تھے۔

ذرائع کے مطابق ان افراد کو حج سے پہلے کئی شہروں سے گرفتار کیا گیا۔

سعودی وزارت خارجہ کے ترجمان نے امریکی خبررساں ادارے ایسوسی ایٹڈ پریس کو بتایا کہ سکیورٹی فورسز نے مکہ کے باہر متبرک مقامات پر شدت پسند حملے کے منصوبے کو ناکام بنا دیا ہے۔

انہوں نے بتایا کہ ان مشتبہ افراد کو حج سے تین روز قبل گرفتار کیا گیا ہے۔

ترجمان نے ان مشتبہ افراد کا تعلق ’گمراہ گروپ‘ سے بتایا ہے۔ سعودی حکومتی اہلکار عام طور پر یہ الفاظ القاعدہ تنظیم کے لیے استعمال کرتے ہیں۔اس سال ایرانی صدر محمود احمدی نژاد سمیت پچیس سے تیس لاکھ افراد نے حج کی سعادت حاصل کی۔

__________________