اگرچہ کراچی میں مہران بیس پر ہونے والے شدت پسند حملے کی تحقیقات جاری ہیں لیکن سکیورٹی اہلکاروں کا کہنا ہے کہ حملہ کرنے والے شدت پسند آپس میں اس طرح بات کر رہے تھے جیسے فوجی کمانڈو کرتے ہیں۔

کراچی میں بی بی سی نیوز کے نامہ نگار شعیب حسن نے سکیورٹی اہلکاروں کے حوالے سے بتایا ہے کہ حملہ آوروں کی گفتگو سن کر ایسے لگتا تھا جیسے وہ فوجی کمانڈو ہوں۔

’ایک حملہ آور دوسرے سے یہ کہتا سنا گیا کہ اس بندے پر ون او کلاک پر فائر کرو۔ بات چیت کا یہ انداز بڑا کمانڈو ہے۔‘

نامہ نگار کے مطابق حملہ آور جس طرح کے ہتھیار استعمال کر رہے تھے طالبان عام طور پر ایسے ہتھیار استعمال نہیں کرتے کیونکہ ایک تو یہ نسبتاً زیادہ حساس ہوتے ہیں دوسرے ان کا استعمال مشکل ہوتا ہے۔

’مجھے بتایا گیا کہ اگرچہ تمام حملہ آور ہی اچھے نشانہ باز تھے لیکن ان میں سے ایک ایسا بھی تھا جس نے چھ سو گز کے فاصلے پر موجود ایک شخص کو نشانہ بنایا، جو کہ بہت بڑی بات ہے۔‘نامہ نگار کے مطابق فوجی ماہرین تو یہ کہہ رہے ہیں کہ ان کی تربیت بہت زیادہ ہوئی ہوئی لگتی ہے۔ ’وہ بہت ہی منجے ہوئے فائٹر تھے اور انہیں لگ الگ ہتھیاروں پر عبور تھا صرف یہ نہیں کہ وہ صرف راکٹ فائر کر سکتے ہیں یا کلاشنکوف ہی اچھی چلا سکتے ہیں۔‘

نامہ نگار کے مطابق طالبان میں عام طور پر ایک بندہ ہوتا ہے جسے راکٹ اچھا چلانا آتا ہوتا ہے جبکہ کوئی اور کلاشنکوف اچھی چلا سکتا ہے لیکن ان میں خاص بات یہ تھی کہ وہ جو ہتھیار بھی استعمال کرتے تھے بہت اچھا کرتے تھے۔

’لوگ تو یہ کہہ رہے ہیں کہ یا تو انہیں فوجیوں نے تربیت دی ہے یا پھر یہ بھی ہو سکتا ہے کہ کبھی نہ کبھی فوج کا حصہ رہے ہیں۔‘

نامہ نگار کے مطابق بے شک طالبان میں ایسے لوگ ہیں جو اس طرح کی مہارت رکھتے ہیں لیکن اس طرح سے انہوں نے حملہ کیا، جس طرح سے یہ ایک جگہ سے دوسری جگہ جا رہے تھے اس سے یہ لگتا تھا کہ ان کا طالبان سے تعلق نہیں ہے۔

امریکہ میں مقیم تجزیہ نگار عارف جمال کا کہنا ہے کہ مہران بیس پر حملے نے بہت سے سوالات کو جنم دیا ہے۔ ’یہ کہ حملہ آور ایک ایسی ہائی سکیورٹی بیس کے اندر پہنچنے میں کس طرح کامیاب ہو گئے جس کی حفاظت پر گیارہ سو محافظ معمور ہیں؟ یہ کیسے ممکن ہے کہ وہ ڈیڑھ میل تک ائیر بیس کے اندر پیدل چلتے رہے ہوں اور انہیں کسی نہ نہیں دیکھا ہو۔‘

عارف جمال کے مطابق انہیں اس بات پر کوئی شک نہیں کہ حملہ آوروں کو اندر سے بہت مدد حاصل تھی اور یہ کتنی تھی اس بارے میں ابھی تک کچھ کہنا مشکل ہے۔ ’جب ہم اس بات کا فیصلہ کر پائیں گے کہ اندر سے مدد کرنے والے کون لوگ تھے تو حملہ آوروں کو پہچاننا آسان ہو جائے گا۔‘جزیہ نگار خالد احمد کا کہنا ہے کہ پاکستانی عوام کو اس حملے کو معروضیت سے دیکھا چاہیے اور اس بات پر غور کرنا چاہیے کہ ہمارے اندر بہت خلفشار موجود ہے اور باہر کی طاقتیں ہمیں اس خلفشار سے بچانا چاہتی ہیں۔

’وہ اس لیے ہمیں اس خلفشار سے بچانا چاہتی ہیں کیونکہ ان کا اپنا دفاع اسی سے منسلک ہے۔ انہیں پتا ہے کہ اگر پاکستان اس خلفشار کے آگے چھک گیا تو یہاں سے بین الاقوامی سطع پر بہت زیادہ گڑ بڑ ہو سکتی ہے۔

بی بی سی اردو

__________________

میرا بلاگ۔ صدائےقلندرhttp://saifikhan011.blogspot.com/