’سانحہ‘‘ کارگل کا ذمہ دار کون تھا؟

’سانحہ‘‘ کارگل کا ذمہ دار کون تھا؟

بریگیڈیئر (ر) شمس الحق قاضی ـ

اس سے تو جنرل (ر) پرویز مشرف کو بھی انکار نہیں کہ کرگل آپریشن کلیۃً جنرل کی اپنی ذاتی تصنیف تھا اور جیسا کہ بیان کیا جاتا ہے کہ اس کیلئے انہوں نے سول حکومت سے ہی نہیں بلکہ جی ایچ کیو اور کور کمانڈروں سے بھی کوئی مشورہ نہیں کیا تھا اور کبھی بھی واضح نہیں کیا کہ اس آپریشن کا مقصد کیا تھا۔
اب جھگڑا صرف اس بات پر چل رہا ہے کہ کارگل آپریشن اس وقت کے وزیراعظم نواز شریف کے علم میں تھا یا نہیں جبکہ حقیقت یہ ہے کہ آپریشن کا وزیراعظم کے علم میں ہونا یا نہ ہونا بے معنی بات ہے۔
اہم بات یہ ہے کہ آپریشن کا لانچ کرنا‘ روکنا یا رکھنا وزیراعظم کے اختیار میں تھا یا نہیں اور آیا وزیراعظم ‘ حکومت یا جی ایچ کیو کو واضح کیا گیا تھا کہ اس آپریشن کا مقصد کیا ہے جبکہ حقیقت یہ ہے کہ ایوب خان سے لیکر پرویز مشرف کے دور تک فوجی کارروائیوں کے بارے میں فوج خود ہی فیصلے کرتی رہی ہے اور چنانچہ کل کلاں موجودہ دور کے بارے میں بھی یہ سوال اٹھایا جائیگا کہ کیا سوات اور وزیرستان کے آپریشن وزیراعظم کے علم سے حکم سے یا اجازت سے لانچ کئے گئے ہیں اور بلکہ پھر یہ سوال بھی پیدا ہو گا کہ آیا وزیراعظم یا کسی فرد یا ایجنسی کو پارلیمنٹ نے آپریشن لانچ کرنے کا حکم یا اجازت دی ہے۔
انگریزی دور میں فوجی کالجوں میں ہمیں پڑھایا جاتا تھا کہ جنگ کرنا اس قدر سنگین معاملہ ہے کہ کلیۃً وردی والوں کے حوالے نہیں کیا جا سکتا۔
اب کارگل کا معامعلہ سمجھنے کیلئے پہلے کارگل کے پس منظر پر گہرا غور کرنا ضرور ہو گا۔ 1948ء کی پاک ہند جنگ کے بعد مقبوضہ کشمیر اور آزاد کشمیر کے درمیان باقاعدہ زمینی سروے کیمطابق جنگ بندی لائن کی پکی نشاندہی کر دی گئی تھی چنانچہ 1965ء کی جنگ کے بعد بھی اس سیز فائر لائن کا احترام کیا جاتا رہا اور جنگ بندی کے بعد دونوں اطراف سے مقبوضہ علاقے خالی کر دئیے گئے تھے۔
لیکن 1972ء کی تیسری جنگ بندی کے بعد جب امریکہ کے یہودی وزیر خارجہ ہنری کسنجری نے بھارت کے سر میں علاقائی سپر پاور بننے کا بھوت سوار کیا تو بھارت نے مقبوضہ علاقے خالی کرانے کی بجائے کنٹرول لائن کی اختراع نکال لی اور چنانچہ کارگل کے علاقہ میں پاکستانی چوکیاں خالی کرنے سے انکار کر دیا کیونکہ سرینگر سے کارگل کے راستے لداخ جانے والی بھارتی سڑک ان چوکیوں کی زد میں تھی۔
اسکے بعد 1984ء میں بھارت کے چپکے سے سیاچن گلیشیئر پر بھی قبضہ کر لیا حالانکہ 1949ء کی ابتدائی سیز فائر لائن کیمطابق سیاچن پاکستانی علاقہ میں تھا اور 1984ء سے قبل بھارت کا کبھی ادھر سے گزر بھی نہیں ہوا تھا اور اس طرح بھارت نے اب ACTUAL یعنی حقیقی کنٹرول لائن کی اختراع سے ایک نئی سرحدی لائن قائم کر لی ہے۔
حقیقت یہ ہے کہ موجودہ بھارت کے قیام سے بھی بہت پہلے ہندو قیادت چاہے وہ گاندھی ہوں یا پنڈت نہرو ہوں ان لوگوں نے کبھی اپنے وعدہ وعید یا باہمی معاہدوں کا احترام نہیں کیا‘ چاہے یہ اردو ہندی رسم الخط میں لکھی جانیوالی واحد قومی زبان ’’ہندوستانی‘‘ کے نام سے رائج کرنے کا وعدہ ہو۔ کیبنٹ مشن کی دی گئی گروپنگ سکیم کی قبولیت کا معاملہ ہو یا سکھوں اور کشمیریوں کو خود مختاری اور رائے شماری کا حق دینے کا وعدہ ہو‘ بات کر کے مُکر جانا ہمیشہ سے ہندو کی عادت رہی ہے اور اب یہ عادت ہمارے زرداری صاحب نے بھی ADOPT کر لی ہے۔
چنانچہ جب پاکستان کی جوابی کارروائی نے سیاچن میں اور بعد میں مجاہدین کے ہاتھوں کارگل میں بھارتیوں کو ناقابل شکست نقصان کا سامنا تھا تو وہ سیاچن سے جان چھڑانے کی تدبیریں کر رہے تھے اور اس سلسلہ میں ان کو امریکہ کی مسلسل حمایت بھی حاصل رہی ہے۔
چنانچہ امریکہ پاکستان پر مسلسل دباؤ ڈال رہا تھا کہ مجاہدین کو کارگل کی چوکیوں سے واپس بلایا جائے جبکہ امریکہ کو بخوبی علم تھا کہ کشمیری مجاہدین پاکستان کی کمان میں آپریشن نہیں کرتے دوسری طرف جبکہ پاکستان نے سیاچن کے محاذ پر بھارت کی دُم پر پاؤں رکھا ہوا تھا تو پورے کشمیر کے بارے میں کسی مناسب پیکج ڈیل کے بغیر امریکی خواہشات کیمطابق انڈیا کو بیل آؤٹ کرنا عقل مندی نہ تھی یہاں پر امریکہ کی طوطا چشمی ملاحظہ ہو۔
گزشتہ کئی سال سے بھارت نے نیلم ویلی میں ہماری لائف لائن کو مسلسل گولہ باری کی زد میں رکھا ہوا ہے۔ امریکہ کو نیلم ویلی میں ہمارے سکول کے بچوں اور بلکہ ہسپتال میں ہمارے مریضوں کے بھارتی گولہ باری سے شہید ہونے کا کبھی افسوس نہیں ہوا اور نہ ہی ان ہزاروں بے خانماں کشمیری مہاجرین کا خیال آیا جن کو بھارتی گولہ باری نے گھر بار سے محروم کر رکھا ہے۔
امریکہ کو یہ بھی احساس نہیں کہ پورے کشمیر میں کنٹرول لائن کے دونوں طرف کے دیہات اور ذرائع آمد و رفت دونوں اطراف کی گولہ باری کی زد میں ہیں اور صرف باہمی رواداری اور فائر بندی کے احترام سے ہی دونوں طرف کاروبار زندگی کو رواں دواں رکھا جا سکتا ہے لیکن چونکہ دونوں طرف کی آبادی مسلمان ہے اس لئے بھارتی حکومت صرف اس صورت میں فائر بندی کا احترام کرتی ہے جب اسکے فوجی ذرائع نقل و حمل پاکستانی گولہ باری کی زد میں ہوں۔
دوسری طرف بھارتی پارٹیوں نے اپنے الیکشن مینی فیسٹو میں پاکستان کو آزاد کشمیر سے بیدخل کرنے کا عزم کر رکھا ہے اور اسی لئے ہر نئی بھارتی حکومت اقتدار سنبھالتے ہی کشمیر میں فارورڈ پالیسی اختیار کر لیتی ہے اور روزِ اول سے ہی پاکستانی علاقہ میں مسلسل اور شدید گولہ باری سے علاقہ میں امن و امان کو تہ و بالا کر دیتی ہے اور پھر مئی 1998ء کے بھارتی ایٹمی دھماکوں کے بعد تو باجپائی اور اسکے وزیر امور کشمیر ایڈوانی نے علی الاعلان پاکستان کو آزاد کشمیر خالی کرنے کا الٹی میٹم دیدیا تھا اور ساتھ ہی ساتھ پاکستانی علاقہ میں گولہ باری میں مزید شدت پیدا کرتے ہوئے سکول کے کئی ایک معصوم بچوں کو شہید کر دیا تھا۔
بھارت کی ان بہیمانہ کارروائیوں کے جواب میں امریکہ نے لاہور میں دونوں وزرائے اعظم کی ملاقات کا ڈرامہ رچا کر ہم سے اعلانِ لاہور کے ذریعے سے اذکار رفتہ شملہ معاہدہ کی تجدید کرا لی لیکن امریکہ نے اسی دوران کشمیریوں پر ڈھائے گئے مظالم سے بھارت کو روکنے کی کوئی کوشش نہیں کی۔ دوسری طرف اب امریکہ کو کارگل علاقہ سے کشمیری مزاحمتی مجاہدین کو نکالنے کی فکر لگی تھی جنہوں نے روز روز کی بھارتی گولہ باری سے تنگ آکر خود بھی فارورڈ پالیسی اختیار کرتے ہوئے اب بھارت کی سرینگر - لداخ لائف لائن کو اپنی زد میں رکھ لیا تھا اور اس طرح تقریباً آٹھ بریگیڈ بھارتی فوج کو نرغے میں لے لیا تھا اور چنانچہ اب بھارتی سانپ کیلئے سیاچن کی چھچھوندر کو نگلنے کے سوا کوئی چارہ نہیں رہا تھا۔
چنانچہ جب کبھی کشمیر میں بھارت کسی مشکل میں پھنستا ہے تو بھارت کیلئے کوئی فیس سیونگ راستہ نکالنے کیلئے امریکہ پاک بھارت مذاکرات کا ڈول ڈالتا ہے تو ہمیں یہ دیکھنا چاہیے کہ مذاکرات کس بنیاد پر کئے جا سکتے ہیں چونکہ بھارتی حکومت خود ہی ساری کنٹرول لائن کو گرم رکھتی ہے اس لئے مذاکرات بھی پورے کشمیر کیلئے ایک پیکیج کی صورت میں ہونے چاہئیں اور یہ پیکج ڈیل دو حصوں پر مشتمل ہو۔
ایک تو مسئلہ کا فوری حل اور دوسرا پورے مسئلہ کشمیر کا مستقل حل۔ فوری حل کیلئے ظاہر ہے کہ فوری طور پر کشمیر سے بھارتی فوج کا انخلا ضروری ہے‘ اس کیلئے کارگل چوکیوں پر بھی قبل از 1972ء کی صورت میں بھارتی قبضہ ختم کرنا چاہیے کیونکہ بھارت نے خود ہی سیاچن پر چپکے سے قبضہ کر کے لائن آف ACTUAL کنٹرول کی اختراع نکالی ہے تو اس لئے آئندہ فائر بندی بھی ACTUAL کنٹرول کیمطابق ہی ہونی چاہیے‘ البتہ امریکہ بہادر کو چاہیے کہ وہ دنیا کی واحد سپر پاور کے ناطے سے دونوں فریقوں سے لائن کا احترام کرائے یعنی بھارت ہماری نیلم ویلی لائف لائن میں رکاوٹ نہ ڈالے۔
کنٹرول لائن کیساتھ ساتھ مقبوضہ کشمیر اور آزاد کشمیر کی شہری آبادیوں کو تختہ مشق نہ بنائے تو ہم بھی بھارت کو کرگل روڈ ڈسٹرب نہ کرنے کا یقین دلائیں۔ اسکے بعد مسئلہ کشمیر کے مستقل حل کیلئے اقوام متحدہ کے پاس کردہ ریزولیشن کی طرف رجوع کرتے ہوئے اس مسئلہ کو اقوام متحدہ کے ذریعے سے ہی طے کیا جائے۔
نواے وقت

__________________