سپریم کورٹ بار ایسوسی ایشن کے صدر بیرسٹر اعتزاز احسن نے کہا ہے کہ پی سی او کے تحت حلف نہ اُٹھانے والےججز کی بحالی کے لیے نئی پارلیمنٹ کو دو سے تین ہفتے دیں گے۔
حکومت نے سپریم کورٹ بار ایسوسی ایشن کے صدر بیرسٹر اعتزاز احسن سمیت تین وکلاء رہنماؤں کی نظر بندی تین روز کے لیے معطل کر دی ہے۔ انہیں یہ رعایت عیدالاضحیٰ کے پیش نظر دی گئی ہے۔

اعتزاز ایک جلوس کی صورت میں پی سی او کے تحت حلف نہ اُٹھانے والےجج جسٹس خواجہ شریف کے گھر گئے جہاں جسٹس خواجہ نے ان کو ہار پہنا کر ان کا خیر مقدم کیا۔

اعتزاز احسن نے کہا کہ آنے والی پارلیمنٹ نے اگر دو تین ہفتوں میں پی سی او کے تحت حلف نہ اُٹھانے والےججز کو بحال نہ کیا تو وہ خود ان ججز کی بحالی کے لیے جوڈیشل بس کا آغاز کریں گے۔

انہوں نے مزید کہا کہ آنے والی پارلیمنٹ کو ہم تسلیم نہیں کریں گے کیونکہ ابھی ہی سے سیاسی جماعتوں کی طرف سے دھاندلی کے الزامات لگ رہے ہیں۔ ’اس کے باوجود ہم اس پارلیمنٹ کو دو سے تین ہفتے دیں گے۔‘

انہوں نے کہا کہ پی سی او کے تحت حلف نہ اُٹھانے والے تمام ججز اب بھی ججز ہیں اور نئی پارلیمنٹ ان کے کاموں میں رکاوٹ نہ ڈالے۔ انہوں نے کہا کہ پہلے ایک جج تھا اور ایک ڈرائیور لیکن اب پینتالیس ججز ہیں اور بے شمار ڈرائیور ہیں۔

واضح رہے کہ عارضی رہائی پانے والوں میں سپریم کورٹ بار ایسو سی ایشن کے سابق صدر جسٹس ریٹائرڈ طارق محمود اور علی احمد کرد بھی شامل ہیں۔

اعتزاز احسن نے ججوں کی بحالی کے لیے جوڈیشل بس چلانے کا اعلان چھ دسمبر کو تمام بار کونسلوں کے نام ایک خط میں کیا تھا۔

اس سے قبل عارضی رہائی پر ان کے گھر کے باہر وکلاء جمع ہو گئے اور سپریم کورٹ کے سابق جسٹس ضیاء محمود مرزا بھی ان کے گھر گئے اور ان کو مبارک باد دی۔

__________________