سپریم کورٹ کے حکم پر گزشتہ دنوں رہا ہونے والوں میں کراچی سے تعلق رکھنے والے چھبیس سالہ نعیم نور خان بھی ہیں۔
ان کی گرفتاری بظاہر القاعدہ کے کمپوٹر ماہر کے طور پر ہوئی اور حکومت کا دعوی تھا کہ ان کی معلومات پر برطانیہ اور امریکہ میں دہشت گردی کے واقعات ناکام بھی بنائے گئے۔ اگر یہ درست تھا تو پھر ان کی رہائی سے کیا پیغام ملتا ہے۔

حکومت اسے بظاہر القاعدہ کا تکنیکی ماہر قرار دیتی رہی جس سے ملنے والی معلومات کی بنا پر بیرون ملک دہشت گردی کی کئی بڑی وارداتوں کو ناکام بنایا جا سکا، کچھ لوگ اسے مبینہ طور پر خفیہ ادارے کا آلہ کار بتاتے رہے جبکہ ان کے وکیل اور رشتہ دار انہیں بےگناہ شخص کے طور پر پیش کرتے رہے۔

سپریم کورٹ سے نعیم نور خان کی رہائی نے ان سے جڑی مختلف کہانیوں کو مزید مبہم کر دیا ہے۔

اگرچہ صدر جنرل پرویز مشرف نے اپنی کتاب ’ان دی لائن آف فائر‘ میں ان کا نام نہیں لیا لیکن ان کے تمام شواہد، تجزیہ کاروں کے مطابق انہی کی جانب اشارہ کرتے ہیں۔

کتاب میں کراچی میں پیدا ہونے والے اس شخص کے بارے میں کہا گیا کہ اس نے ایک مقامی انجینئرنگ یونیورسٹی سے کمپوٹر میں ڈگری حاصل کی لہذا اس شخص کا ذکر القاعدہ کے پاکستان میں شعبہِ ٹیکنالوجی کے سربراہ کے طور پر کیا گیا۔

صدر کے مطابق خالد شیخ محمد نے اسے القاعدہ میں بھرتی کیا تاہم اس کی گرفتاری جولائی دو ہزار چار میں لاہور سے عمل میں آئی۔ اس گرفتاری کو دہشت گردی کے خلاف جنگ میں ایک اہم کامیابی کے طور پر پیش کیا گیا۔

کتاب کے مطابق ان سے ملنے والے ایک لیپ ٹاپ نے برطانیہ اور امریکہ میں دہشت گردی کے منصوبہ کا پردہ چاک کیا۔ یہ حملے ہوائی اڈوں اور ریلوے سٹیشنوں اور اہم معاشی اہداف پر ہونے تھے۔

لیکن گزشتہ روز اعلی عدالت کے دباؤ سے اس کی رہائی عمل میں آئی۔ اگر صدر کا بیان درست ہے تو پھر اسے رہائی کیوں کر مل پائی۔ ایک اور سوال یہ بھی اٹھتا ہے کہ خالد شیخ محمد جیسے افراد کو تو منٹوں میں امریکہ کے حوالے کر دیا گیا، نعیم کیوں پاکستان میں ہی رہے؟

اس سے کیا ظاہر ہوتا ہے، یہ سوال میں نے نعیم کے وکیل بابر اعوان کے سامنے رکھا تو ان کا کہنا تھا کہ اس سے ظاہر ہوتا ہے کہ گیارہ ستمبر کے حملوں کے بعد دنیا بھر میں دہشت گردی کے خلاف جنگ کے نام پر ریاستوں، حکومتوں اور حکمرانوں نے ماورائے عدالت شہریوں کو اٹھانا شروع کیا، یہ اس سلسلے کا پہلا کیس تھا پاکستان میں۔

’انہیں جولائی دو ہزار چار سے زیر حراست رکھا گیا اور کسی سے ملنے نہیں دیا گیا، نہ انہیں گرفتاری کی وجہ بتائی گئی اور نہ ہی کسی عدالت میں پیش کیا گیا۔‘

ان پر لگنے والے الزامات کے بارے میں بابر اعوان کا موقف تھا: ’اگر ایک لفظ بھی اس میں درست ہوتا تو آج یہ رہائی عمل میں نہ آ سکتی۔ یہ خود ان کی بےگناہی ثابت کرتی ہے۔‘

نعیم پر لگنے والے سرکاری الزامات کے بارے میں جب وزارت داخلہ کے ترجمان بریگیڈئر ریٹائرڈ جاوید اقبال چیمہ سے دریافت کیا تو ان کا کہنا تھا کہ ضروری نہیں کہ ہر شخص پر مقدمہ چلایا جائے یا اسے غیرمعینہ مدت کے لیئے زیر حراست رکھا جائے۔

’ہمیں دیکھنا ہوتا ہے کہ آیا ہمارے پاس ایسی شہادت ہے جو عدالت میں قابل قبول ہو۔ میں تحقیقات کے بارے میں زیادہ کچھ نہیں کہہ سکتا کہ کیا تفتیش کی گئی۔ ہاں بعض سرگرمیوں کی وجہ سے لوگ پکڑے جاتے ہیں، ان پر الزامات عائد ہوتے ہیں اور اگر ان کے خلاف ثبوت ہو تو مقدمہ چلایا جاتا ہے ورنہ نہیں۔‘

کچھ لوگوں کے مطابق امریکہ میں گیارہ ستمبر کے حملوں کے بعد مخصوص حالات کا نعیم نور خان شکار ہوا ہے جبکہ کچھ کا کہنا ہے کہ خفیہ اداروں کی کارروائیوں کی طرح اس گرفتاری کی حقیقت کبھی بھی شاید واضح نہیں ہو پائے گی۔