25 ستمبر 2010
کوئٹہ (مانیٹرنگ ڈیسک) وفاقی وزیر دفاعی پیداوار عبدالقیوم جتوئی نے کہا ہے کہ چیف جسٹس افتخار محمد چوہدری جعلی ڈومیسائل پر جج بنے ہیں اور پیپلز پارٹی کو بوٹوں سے نہیں ڈرایا جا سکتا۔ بگٹی ہاﺅس کوئٹہ میں طلال بگٹی سے ملاقات کے بعد میڈیا سے گفتگو کرتے ہوئے اُنہوں نے کہا کہ جعلی ڈگریوں کا الزام لگا کر ارکان پارلیمنٹ کو بدنام کیا جاتا ہے اور اُنہیں کٹہروں میں گھسیٹا جا تا ہے لیکن اب اس بات کا فیصلہ بھی ہونا چاہیے کہ چیف جسٹس آف پاکستان افتخار محمد چوہدری فیصل آباد کا ڈومیسائل رکھنے کے باوجود بلوچستان کے کوٹے پر کیسے جج بن گئے ۔ عبدالقیوم جتوئی نے کہا پیپلز پارٹی کو بوٹوں سے نہیں ڈرایا جا سکتا اورپیپلز پارٹی کے کارکنوں نے اس ملک کیلئے بہت قربانیا ں دی ہیں ۔ اُنہوں نے کہا کہ فوج کو عوام نے سرحدوں کی حفاظت کیلئے بوٹ پہنائے ہیں نہ کہ بے گناہ لوگوں کو شہید کرنے کیلئے۔اُن کا کہنا تھا کہ نواب اکبر بگٹی کے قتل میں بھی فوج ملوث ہے اور اس کی ذمہ داری سابق آرمی چیف پرویز مشرف ،جام یوسف ،اویس غنی اور انکے دیگر ساتھیوں پر عائد ہوتی ہے۔ایک سوال کے جواب میں انہوں نے کہا کہ پیپلز پارٹی کے خلاف کرپشن کا واویلا کیا جاتا ہے لیکن وہ مطالبہ کرتے ہیں کہ کرپشن میں بھی مساوات ہونی چاہیے۔ انہوں نے کہا کہ اگر سندھی بلوچی،پنجابی،پٹھان سمیت تمام لوگوں کو کرپشن کے مساوی موقعے دیے جائیں تو کوئی کرپشن کا واویلا نہیں کرے گا۔

__________________
جاویداسد