برطانوی وزیر خارجہ ڈیوڈ ملی بینڈ نے پاکستانی عوام سے کہا ہے کہ پاکستان کی نئی مخلوط حکومت کی تعریف ہونی چاہیے کہ اس نے بینظیر بھٹو کے قتل کے بعد مشکل حالات میں جمہوری انداز میں منتخب ہو کر اقتدار سنبھالا۔
ڈیوڈ مِلی بینڈ نے پاکستان کے دو روزہ دورے کے بعد سابق وزیر اعظم نواز شریف اور آصف علی زرداری کے ساتھ عشایئے میں ملاقات کی۔ ڈیوڈ مِلی بینڈ نے کہا کہ وہ اس بات سے بہت متاثر ہوئے تھے کہ دونوں رہنماء ایک دوسرے سے جمہوریت کے بارے میں بات کر رہے تھے۔

ملی بینڈ نے کہا کہ اس بات سے انکار نہیں کیا جا سکتا کہ پاکستان کی مخلوط حکومت کو بڑی مشکلات کا سامنا ہے۔ انہوں نے کہا کہ اس بات کے شواہد ہیں کہ القاعدہ پاکستان اور افغانستان کی سرحد کے دونوں جانب موجود ہے۔

برطانیہ پاکستانی حکومت کی شدت پسندوں کے ساتھ مذاکرات کے ذریعے امن کی کوشش کے حق میں ہے۔ تاہم ملی بینڈ نے ان لوگوں کو متنبہ کیا جو کہتے ہیں کہ پاکستانی فوج کو شدت پسندوں کے خلاف استعمال نہیں کیا جانا چاہیے۔ انہوں نے کہا کہ ’مفاہمت کا مطلب یہ نہیں ہونا چاہیے کہ دہشت گردوں کو کام کرنے کا موقع دیا جائے‘۔

بی بی سی کے نامہ نگار جیم رابنز نے کہا کہ ڈیوڈ ملی بینڈ نے انہیں بتایا ہے کہ برطانیہ میں تیار ہونے والے دہشت گردی کے ستر فیصد منصوبوں کا سر پاکستان سے ملتا ہے۔

__________________