15 ستمبر 2010
نئی دہلی (مانیٹرنگ ڈیسک)بھارتی وزیر اعظم من موہن سنگھ مقبوضہ نے کشمیر کی بگڑتی ہوئی صورتحال پر آل پارٹیز کانفرنس سے خطاب کرتے ہوئے کہا ہے کہ مذاکرات ہی آگے بڑھنے کا واحد راستہ ہیںلیکن بات چیت صرف اسی وقت ہو سکتی ہے جب سب پر امن رہیں۔دوسری جانب مقبوضہ وادی میں بھارتی ریاستی دہشت گردی جاری ہے اور تازہ کارروائیوں میں مزید دو کشمیری شہید اور متعدد زخمی ہوئے ہیں۔نئی دہلی میں بھارتی وزیر اعظم کی قیام گاہ میں ہونے والی اے پی سی میں نیشنل کانفرنس ،پیپلز ڈیموکریٹک پارٹی ،بی جے پی ،کانگریس اور دوسری سیاسی جماعتوں کے رہنماءشریک ہیں ۔کانفرنس سے خطاب میں من موہن سنگھ نے کہا کہ با معنی مذاکرات تشدد اور محاذ آرائی سے پاک ماحول میں ہی ہو سکتے ہیں ۔انہوں نے کہا کہ بات چیت صرف اسی وقت ہو سکتی ہے جب سب پر امن رہیں ۔من موہن سنگھ نے کشمیری عوام سے پرامن رہنے کی اپیل کی اور کہا کہ بھارت کسی بھی گروپ یاکسی بھی ایسے شخص کے ساتھ مذاکرات کیلئے تیار ہے جو تشدد میں ملوث نہیں ہے ۔کانفرنس میں مقبوضہ کشمیر میں بھارتی سکیورٹی فورسز کو دیے گئے خصوصی اختیارات ایکٹ پر بات چیت کی جارہی ہے ۔ مقبوضہ کشمیر کے وزیر اعلیٰ عمر عبداللہ کا کہنا ہے کہ پر امن علاقوں میں فوج کو دیے گئے اختیارات واپس لیے جائیں جبکہ اپوزیشن جماعت بی جے پی بی جی پی اس ایکٹ میں کوئی تبدیلی نہیں چاہتی اِس لیے اِس ایکٹ کے مکمل خاتمے کا مطالبہ کر رہی ہے ۔دوسری جانب قابض بھارتی فوج مظاہرین کو دیکھتے ہی گولی مارنے کے اختیارات کے ساتھ وادی میں گشت کر رہی ہے تاہم اِ س کے باوجود درجنوں مقامات پر سینکڑوں مظاہرین نے احتجاج کیا اورسیکورٹی فورسز کی فائرنگ سے دو افراد شہید جبکہ پندرہ زخمی ہوگئے ۔ واضح رہے کہ دو روز میں جاں بحق ہونے والوں کی تعداد 20سے زائد ہوچکی ہے۔غیر ملکی خبر رساں ادارے کے مطابق سری نگر سمیت ایک درجن شہروں میں مظاہرے کئے گئے جن میں سینکڑوں افراد نے شرکت کی۔ مظاہرین نے بھارتی وزیراعظم من موہن سنگھ مقبوضہ کشمیر کے وزیر اعلیٰ عمر فاروق کے پتلے، امریکی اور بھارتی پرچم نذر آتش کرنے کے ساتھ ساتھ’گو انڈیا گو اور لے کے رہیں گے آزادی‘ کے فلک شگاف نعرے لگا رہے ہیں ۔ بھارتی فوجی لاﺅ ڈ سپیکرز کے ذریعے مظاہرین کو منتشر نہ ہونے کی صورت میں گولی مارنے کی دھمکیاں دیتے رہے۔ کئی مقامات پر پر امن مظاہرین پر شیلنگ اور فائرنگ کی بھی اطلاعات موصول ہوئی ہیں۔ بھارتی حکومت نے سکیورٹی خدشات کے باعث سری نگر ائیر پورٹ کو پروازوں کے لئے بند کردیا ہے۔ بیج بہاڑہ میں بھارتی فوجیوں نے گھروں میں گھس کر خواتین کو تشدد کا نشانہ بنایا جن میں سے دو کو تشویش ناک حالت میں ہسپتال منتقل کردیا گیا ہے۔ تنگ مرگ میں گھر گھر تلاشی کے دوران درجنوں نوجوانوں کو گرفتار کرلیا گیا ۔مقبوضہ وادی میں عید الفطر کے دن نافذ کئے جانے والے کرفیو میں مزید سختی کردی گئی ہے اور کرفیو کی خلاف ورزی کرنے والوں کو دیکھتے ہی گولی مارنے کا حکم دیا گیا ہے لیکن دن بھر جاری رہنے والی شیلنگ اور فائرنگ کشمیریوں کے جذبہ حریت کو کمزور نہیں کرسکی ۔

__________________
جاویداسد