لندن (صالح ظافر/ مانیٹرنگ ڈیسک)برخوردار ! ہوسکتا ہے کہ تمہاری طرح کے سیکڑوں جذباتی اس پر دو چار دن واہ واہ کر لیں کہ تم نے اسلام آباد کے بھرے مجمع میں مسز جنرل اشفاق کیانی کی موجودگی میں امریکی سفیر کے ہاتھ سے ہاورڈ سکالر شپ لینے سے انکار کرکے دونوں کو بھونچکا کردیا اور یوں تم نے مہمند ایجنسی پر امریکی بمباری پر احتجاج کرتے ہوئے کچھ اخبارات میں جگہ حاصل کرلی، کاش تمہیں معلوم ہوتا کہ تمہاری طرح کے جذباتی لوگوں کی اس طرح کی حرکتوں سے ملکوں کی پالیسیاں بدلتی ہیں اور نہ ڈھٹائیاں ختم ہوتی ہیں، اگر تمہیں معلوم ہوتا کہ تم ہاورڈ کی تعلیم سے مسلح ہو کر اپنے ”کاز“ کے لیے زیادہ بہتر طور سے لڑ سکتے ہو تو شاید تم اپنے بچکانہ پن کو ذرا دیر کے لیے قابو میں رکھتے، وہ ہاورڈ سکالر شپ جس کے خواب دیکھتے دیکھتے لاکھوں طلبا اپنے تصورات میں جیتے اور مرتے ہیں، تم نے اسے لات مار دی، پیارے صمد خرم ! اس دنیا میں کامیابی اسے ملتی ہے جو تمہاری طرح تنک مزاج نہ ہو اور جس کی کھال گینڈے سے زیادہ موٹی ہو، تم ویسے چیز کیا ہو ؟ کیا سارتر ہو جس نے نوبل پرائز دھتکار دیا تھا یا پھر ڈڈلی نکولس، جارج سکاٹ یا مارلن برانڈو ہو جنہوں نے آسکر مسترد کرکے اپنی عظمت کی ٹوپی میں سرخاب کے ایک اور پر کا اضافہ کرلیا، صمد خرم ! تم نے جو کرنا تھا سو کرلیا لیکن امریکی کیا کریں جنہیں اپنا امیج بہتر بنانے پر کروڑوں ڈالر صرف کرکے اور اس مقصد کے لیے ایک علیحدہ نائب وزیر خارجہ مقرر کرنے کے باوجود بھی اس سوال کے جواب کی تلاش ہے کہ آخر لوگ امریکہ سے کیوں نفرت کرتے ہیں ؟ صمد خرم ! یا تو تم چریا ہو یا پھر امریکہ پاگل ہے !۔دریں اثنااسلام آباد سے نمائندہ جنگ کے مطابق میاں محمود علی قصوری فاؤنڈیشن نے پاکستانی طالبعلم صمد خرم کو اعلیٰ تعلیم کیلئے مکمل وظیفہ دینے کی پیشکش کی ہے انہیں یہ پیشکش اس جرأت پر کی گئی ہے جو انہوں نے امریکی سفیر این ڈبلیو پیٹرسن سے ہاورڈ یونیورسٹی کا وظیفہ لینے سے انکار کر کے دکھائی تھی۔یہ وظیفہ مرحوم میاں محمد قصوری کے صاحبزادے اور سابق وزیر خارجہ میاں خورشید محمود قصوری کے بھائی دانیال قصوری نے انہیں دینے کا اعلان کیا ہے، مرحوم میاں محمود علی قصوری بھٹو کے دور میں سابق وفاقی وزیر قانون تھے اور وہ73 کے آئین کے معاون مصنف بھی تصور کئے جاتے ہیں۔صمد خرم نے روٹ کالج انٹرنیشنل کے زیر اہتمام ہونے والی تقریب میں جب مہمند ایجنسی پر حالیہ امریکی حملوں پر احتجاجاً امریکی سفیر سے وظیفہ لینے سے انکار کیا تو پورا ہال حاضرین کی تالیوں سے گونج اٹھاتھا، امریکی سفیر نے اس موقع پر یہ تاثر دینے کی کوشش کی کہ طالبعلم نے وظیفہ لینے سے انکار نہیں کیا، بیکن ہاؤس اسکول سسٹم کے علاقائی ڈائریکٹر نے صحافیوں سے گفتگو کرتے ہوئے بتایا کہ بیکن ہاؤس نیشنل یونیورسٹی میں صمد کو انکی مکمل تعلیم کیلئے وظیفہ دیاجائیگا اور انہیں یونیورسٹی کا سب سے قابل احترام طالبعلم گردانا جائیگا، دانیا ل نے مزید کہا کہ صمد خرم نے کوئی چھوٹا کام نہیں کیا اس نے اپنے انکار کے ذریعے ہمارے سر فخر سے بلند کردیئے ہیں اور ہمیں ان پر فخر ہے۔