” کچھ غلطیوں اور نالائقیوں کی وجہ سے الیکشن میں نقصان ہوا“، مشاہد حسین
اسلام آباد( طاہر خلیل/ نمائندہ جنگ) پاکستان مسلم لیگ )قائد اعظم ) نے اپوزیشن میں بیٹھنے کا فیصلہ کر لیا ہے اور کہا ہے کہ وہ نئی مخلوط حکومت کا حصہ نہیں بنیں گے،گزشتہ ایک برس کی ہماری کچھ غلطیوں اور نالائقیوں کی وجہ سے ہمیں الیکشن میں نقصان ہوا۔ پاکستان مسلم لیگ (ق) کے سیکرٹری جنرل سینیٹر مشاہد حسین سید نے منگل کو ” جنگ“کو انٹرویو میں کہا کہ ہم قومی مفاہمت کے وسیع تر ایجنڈے پر کام کریں گے ۔ منفی سیاست ، تصادم اور محاذ آرائی سے ملک کو پہلے ہی بہت نقصان ہو چکا ہے ۔ ملک میں جمہوریت اور جمہوری اداروں کے استحکام کیلئے مکمل تعاون کریں گے تا کہ نئی پارلیمنٹ فعال کردار ادا کرسکے۔ انہوں نے کہا کہ گزشتہ ایک برس کی ہماری کچھ غلطیوں اور نالائقیوں کی وجہ سے ہمیں الیکشن میں نقصان ہوا، اب ہمیں آگے بڑھنا ہے اور ماضی کی تلخیوں کو فراموش کرنا ہے ۔ ایک سال سے ملک کی فضا کشیدہ تھی اب کشیدگی ختم ہونی چاہئے۔ پارلیمنٹ ، آرمی اور صدر اپنی اپنی حدود میں کام کریں اور مشترکہ قومی مسائل پر سیاستدانوں کو اتفاق رائے کا مظاہرہ کرنا ہوگا۔

__________________