واشنگٹن (پ ر) ایم کیو ایم امریکا کے سینٹرل آرگنائزر اور آرگنائزنگ کمیٹی کے ارکان نے کہا ہے کہ 19/جون 1992ء پاکستان کی سیاسی تاریخ کا سیاہ ترین دن ہے۔ 19/جون کے شہداء کی سہولہویں برسی کے موقع پر ایک بیان میں انہوں نے کہا کہ ایم کیو ایم کیخلاف آپریشن کے دوران ایم کیو ایم کے 15 ہزار سے زائد کارکنان کو ماورائے عدالت قتل کیا گیا، ہزاروں کارکنان کو قید وبند کی صعوبتیں برداشت کرنے پر مجبور کیا گیا، ایم کیو ایم کے دفاتر اور کارکنان کے گھروں پر قبضے کئے گئے، حق پرست ماؤں بہنوں اور معصوم بچوں کو بھی بربریت کا نشانہ بنایا گیا لیکن ان تمام ظلم و زیادتیوں کے باوجود ایم کیو ایم نہ صرف آج بھی قائم ودائم ہے بلکہ پہلے سے زیادہ مستحکم و مضبوط بھی ہے۔ انہوں نے کہا کہ قائد تحریک الطاف حسین کا حق پرستانہ فکر و فلسفہ ملک بھر میں تیزی سے پھیل رہا اور ملک بھر کے عوام ایم کیو ایم کے پرچم تلے متحد ہو رہے ہیں۔ انہوں نے حق پرست شہداء کے ایصال ثواب کیلئے فاتحہ خوانی بھی کی۔