2008ء کے آخرتک پاکستانی صدر دستبردارہوجائینگے،فنانشل ٹائمزکی پیشگوئی



لندن(جنگ نیوز)ایک برطانوی روزنامے نے منگل سے شروع ہونے والے نئے عیسوی سال 2008کے حوالے سے مختلف پیشگوئیاں کی ہیں جس میں یہ پیشگوئی بھی شامل ہے کہ پاکستانی صدر 2008ء کے آخرتک دستبردار ہوجائیں گے جبکہ اس دوران امریکی سابق خاتون اول ہیلری کلنٹن نومبرکے صدارتی انتخابات جیت کر امریکی صدر بن جائیں گی۔ تفصیلات کے مطابق برطانوی روزنامے فنانشلٹائمز نے پیر کو اپنی ایک رپورٹ میں سال2008کے بارے میں بعض اہم باتوں سے متعلق پیشگوئیاں کی ہیں۔پاکستان کے حوالے سے رپورٹ میں پیشگوئی کی گئی ہے کہ 2007کے طوفانی سال کے آخری دنوں میں بے نظیر بھٹو کے قتل نے سب کچھ ہلاکر رکھدیا ہے اور صدر پرویز مشرف کو سال2008 میں اس سے بد ترصورتحال کا سامنا کرنا ہوگا۔رپورٹ کے مطابق پاکستانی فوج اور امریکہ میں صدر پرویز مشرف کی حمایت کرنے والے شاید یہ نتیجہ اخذ کریں کہ ان کی شخصیت بہت زیادہ داغدار ہے اوریہ صورتحال ان کی مزید حمایت کے حصول میں تقسیم کاباعث ہو۔رپورٹ میں کہا گیا ہے کہ اس سے بہتر موقع کوئی اور نہیں ہوسکتا کہ اس سال کے آخر تک صدر پرویز مشرف عہدہٴ صدارت پر نہ رہیں۔ رپورٹ کے مطابق اس سال امریکہ میں نومبر کے صدارتی انتخابات میں سینیٹر ہیلری کلنٹن کی کامیابی کا امکان ہے۔رپورٹ کے مطابق اگرکوئی بڑا الٹ پلٹ نہ ہوا توڈیموکریٹس کی نامزد امیدوار ہیلری کلنٹن یہ انتخابات جیت جائیں گی اورموجودہ (بش )انتظامیہ کے بڑے پیمانے پر غیرمقبول ہونے کی وجہ سے ہیلری کلنٹن اس عہدے کی امیدوار ہونگی جبکہ ان کے مخالف صدارتی امیدوار بارک اوبامہ کی حمایت میں اضافے کے حوالے سے کسی بڑی پیشرفت کا امکان نہیں۔