70 لاکھ غریبوں کی خریداری کیلئے بینظیر کارڈز دیں گے،زرداری




اسلام آباد( ایجنسیاں) پیپلزپارٹی کے شریک چےئرمین آصف علی زرداری نے کہا ہے کہ صدر پرویز مشرف کو رخصت کرنا کا فیصلہ پارلیمنٹ اور عوام نے کرنا ہے ۔ وکلا کے لانگ مارچ کا اسلام آباد میں خیر مقدم کریں گے۔ جنوبی ایشیا کھلی مارکیٹ کا مرکز ہونا چاہئے۔ 70 لاکھ غریبوں کو خریداری کیلئے بینظیر کارڈ دیئے جائیں گے ،صدر کی رخصتی کا فیصلہ پارلیمنٹ میں ہوگا، میں مذاکرات کے ذریعے قومی امور حل کرنا چاہتاہوں، (ن) لیگ ہنگامی اقدامات پر یقین رکھتی ہے، آئینی پیکج حتمی مرحلے میں ہے ، بینظیر کے قتل کی تحقیقات کیلئے درخواست اقوام متحدہ کو بھجوا دی ، امریکا سے تعلقات باہمی احترام پر مبنی ہونا چاہئیں ،خطے میں پائیدار امن کیلئے مسئلہ کشمیر کا حل ضروری ہے، ان خیا لات کا اظہار انہوں نے امریکی اخبار واشنگٹن پوسٹ کو انٹرویو اور سوشلسٹ انٹرنیشنل پیسیفک سیمینار کے بعد پریس کانفرنس سے خطاب کرتے ہوئے کیا ۔ آصف زرداری نے کہاکہ دہشتگردوں کے ساتھ مذاکرات نہیں ہونگے۔ قبائلیوں سے امن بات چیت ہوسکتی ہے۔ انہوں نے حکمران اتحاد میں کوئی دراڑ نہیں ۔ آئینی پیکج کے ذریعے سول سوسائٹی ماڈرن اور لبرل بن جائیگی۔تفصیلات کے مطابق پیپلز پارٹی کے شریک چیئرمین آصف علی زرداری نے کہا ہے کہ امریکہ اور پاکستان کے تعلقات کو صرف سیکورٹی تعاون تک محدود نہیں رہنا چاہئے بلکہ دوطرفہ تعاون کو وسیع البنیاد بنانے کی ضرورت ہے، خطہ میں پائیدار امن کیلئے مسئلہ کشمیر حل کرنا ہو گا۔ ”واشنگٹن ٹائمز“ کو انٹرویو میں انہوں نے کہا کہ ایک کثیرالجہتی سوچ کے ذریعہ انتہا پسندی پر موثر طریقہ سے قابو پایا جا سکتا ہے۔ انہوں نے کہا کہ پاکستان اور ا مریکہ کے تعلقات صرف فوجی تعاون تک محدود رکھنے کی بجائے مشترکہ اقدار کے فروغ اور باہمی احترام کی بنیاد پر استوار ہونے چاہئیں۔ اگر مغرب ہمارے لئے پائیدار اقتصادی اور سماجی ترقی، موثر معیشت، حقیقی تعلیمی نظام اور صحت کی بہتری کی سہولتوں کا کوئی منصوبہ تیار کرتا ہے تو ہماری سرحدوں کے اندر دہشت گردی اور انتہا پسندی کے خطرہ کو کم کیا جا سکتا ہے۔ انہوں نے کہا کہ پاکستان امریکی سینٹ کی خارجہ تعلقات کی کمیٹی کے چیئرمین سین جوزف بڈن کی طرف سے اقتصادی امداد کے منصوبے کو سراہتا ہے۔ مسئلہ کشمیر کے حوالے سے انہوں نے کہا کہ یہ دیرینہ تنازعہ کشمیریوں سمیت تمام متعلقہ فریقین کی منشاء کے مطابق حل کیا جانا چاہئے کیونکہ خطہ میں حقیقی اور پائیدار امن کیلئے اس مسئلہ کا حل ضروری ہے۔ آصف علی زرداری نے توقع ظاہر کی ہے کہ قومی اسمبلی جون کے ختم ہونے سے قبل عدالتی اصلاحات کے پیکج پر غور کرے گی، حکومتی اتحاد میں شامل تمام جماعتیں اس کی حمایت کریں گی،آئین کے مطابق تمام اختیارات واپس پارلیمنٹ کو سونپے جائیں گے۔ حکومتی اتحاد کے متعلق ایک سوال کے جواب میں آصف علی زرداری نے کہا کہ اس میں شامل جماعتیں مکمل اتفاق رائے پیدا کرنے پر رضا مند ہیں، جمعہ کو سوشلسٹ انٹر نیشنل ایشیاء پیسفک کمیٹی کے اجلاس کے بعد تنظیم کے سیکرٹری جنرل کے ہمراہ پریس کانفرنس سے خطاب کرتے ہوئے کیا۔ آصف علی زرداری نے کہاکہ ایشیاء پیسفک کمیٹی کی جانب سے بے نظیر بھٹو کی شہادت کی تحقیقات اقوام متحدہ سے کرانے کے مطالبے کی حمایت پر تنظیم کاشکریہ ادا کرتے ہیں۔ انہوں نے کہاکہ پاکستان کے عوام نے جمہوریت کیلئے بے پناہ قربانیاں دی ہیں۔ انہوں نے کہاکہ آج بھی ہم حقیقی جمہوریت کے عزم کا اعادہ کرتے ہیں مسائل بات چیت اور مذاکرات کے ذریعے حل ہو سکتے ہیں جمہوریت کیلئے ہرقوت کے جذبات کی قدر کرتا ہوں ۔ پاکستان پیپلز پارٹی ایک میچور پارٹی ہے اسی تصور کے تحت پارٹی کو آگے بڑھائیں گے صدر کے مواخذے کے بارے سوال کے جواب میں آصف علی زرداری نے کہاکہ عوام او رپارلیمنٹ جب چاہیں گے صدر کو رخصت کر دیاجائے گا۔ آئینی پیکج حتمی مراحل میں ہے پارلیمنٹ میں پیش کرنے سے پہلے نواز شریف سے اجازت لیں گے دوسری جماعتوں اور پارلیمنٹ میں موجود ہم خیال جماعتو ں کو بھی آئینی پیکج کا مسودہ دیاجائے گا میڈیا کو بھی اس کا مسودہ فراہم کیا جائے گا مل کر فیصلہ کریں گے کہ کس تاریخ کو آئینی پیکج پیش کرنا ہے بے نظیر بھٹو کی شہادت کے حوالے سے درخواست اقوام متحدہ کو بھجوا دی گئی ہے عملدر آمد کے مرحلے میں ہیں وزیر خارجہ اور حکومت پاکستان کا ایک اور نمائندہ اقوام متحدہ کے سیکرٹری جنرل سے ملاقات کرے گا۔انہوں نے کہاکہ لانگ مارچ کا اسلام آباد میں خیر مقدم کریں گے لانگ مارچ کے شرکاء کو پانی ، خوراک یا کسی اور چیز کی ضرورت ہوئی تو فراہم کریں گے شاید ہم لانگ مارچ والوں کو کھانے پر بلا لیں ۔ زیادہ گرمی ہوئی تو لانگ مارچ والوں نے اگر چاہا تو انہیں شکر پڑیاں لے جائیں گے انہوں نے کہاکہ میڈیا ہمیں معاملات طے کرنے دے ہمیں وقت دے ہم نے مل کر جمہوری جدوجہد کے ذریعے میڈیا کی آزادی حاصل کی ہے جمہوریت کی خاطر ایسے حالات اور زمینی حقائق پیدا نہ کئے جائیں تو غیر جمہوری قوتوں کیلئے مدد گار ثابت ہوں ۔

__________________