پشین(نمائندہ جنگ+ایجنسیاں) 8جنوری کو فراڈ الیکشن کا بائیکاٹ کیا جائے گا، اس روز پولنگ اسٹیشن ویران رہیں گے۔ ہماری جدوجہد عدلیہ کی2نومبر والی پوزیشن کی بحالی، میڈیا کی آزادی اور پاکستان میں مکمل جمہوری نظام کے قیام کے لئے ہے۔ ان خیالات کا اظہار پشین اسٹیڈیم میں آل پارٹیز ڈیموکریٹک موومنٹ کے جلسے سے مقررین نے خطاب کرتے ہوئے کیا۔جلسے سے خطاب کرنے والوں میں پشتونخوامیپ کے چیئرمین محمود اچکزئی، جماعت اسلامی کے مرکزی امیر قاضی حسین احمد، نیشنل پارٹی کے مرکزی صدر ڈاکٹر عبدالحئی بلوچ، بلوچستان نیشنل پارٹی کے قائم مقام صدر ڈاکٹر جہانزیب جمالدینی، صوبہ سرحد کے سابق سینئر وزیر سراج الحق، تحریک انصاف کے صوبائی آرگنائزر شاہد قاضی، جے ڈبلیو پی کے مرکزی رہنما حاجی اشرف کاکڑ، بلوچستان بار ایسوسی ایشن کے صدر باز محمد کاکڑ، ہائیکورٹ بار ایسوسی ایشن کے صدر ہادی شکیل اور پشتونخوامیپ کے صوبائی صدر عثمان کاکڑ شامل تھے۔ محمود خان اچکزئی نے کہا کہ8جنوری کے الیکشن فراڈ ہوں گے اور پرویز مشرف کے غیرآئینی اقدامات کو طول دینے کا باعث بنیں گے۔انہوں نے کہا کہ بلوچوں کا گناہ یہ ہے کہ وہ بلوچ سرزمین کی نعمتوں پر حق مانگ رہے ہیں، اسی طرح گزشتہ60 سال سے پشتون وطن کی بجلی و پانی و دیگر وسائل کو لوٹا جارہا ہے۔ آئین کو فردواحد کیلئے استعمال کیا جارہا ہے۔ حکمرانوں کی غلط پالیسیوں نے پاکستان کو دنیا کی ناکام ریاست بنا دیا ہے۔ ہماری جدوجہد ججوں کی مکمل بحالی، میڈیا کی آزادی اور مکمل جمہوری پاکستان کے قیام تک جاری رہے گی۔ انہوں نے کہا کہ مولانا فضل الرحمن، مفتی محمود کا فلسفہ بھول گئے اور غیرآئینی حکمرانوں کی نگرانی میں الیکشن قبول کرلیا افسوس کہ بعض سیاسی جماعتوں نے ذاتی مفادات کیلئے ملکی استحکام کو داؤ پر لگا دیا۔ انہوں نے کہا کہ دہشت گردی کا بہانہ بنا کر ملک میں دائمی مارشل لا نافذ کیا گیا مگر12مئی کو کراچی شہر میں نہتے لوگوں پر فائرنگ کیا دہشت گردی نہیں تھی؟ انہوں نے پشتون عوام سے اپیل کی کہ وہ8جنوری کو الیکشن کا بائیکاٹ کریں، احتجاج کریں اور متحد ہونے کا ثبوت دیں۔ جلسہ سے جماعت اسلامی کے امیر قاضی حسین احمد نے پشتونخوا میپ کو پشین میں تاریخی جلسہ عام منعقد کرنے پر مبارک باد پیش کی اور کہا کہ اسلام ہمیں عدل اور انصاف کا درس دیتا ہے۔ پشتون بلوچ رہنماؤں نے جس طرح ان کے ساتھ ظلم کی فریاد بیان کی میں اس سے مکمل متفق ہوں۔ انہوں نے کہا کہ حکمرانوں کی غلط پالیسیوں کی وجہ سے ملک میں دہشت گردی اور خودکش حملوں نے جنم لیا اور آج ایک مرتبہ پھر ہمارے فوجی حکمرانوں کے غیرآئینی، غیر شرعی اور ناروا اقدامات کی وجہ سے ملک دولخت ہونے کو ہے۔ ملک میں عدم استحکام ختم کرنے کے لئے ضروری ہے کہ فوری طور پر صوبوں کو خودمختار بنایا جائے اور اسلام کے زریں اصولوں کے مطابق تمام اقوام کا برابری کی بنیاد پرحق تسلیم کیا جائے۔ حقائق تسلیم نہ کئے گئے تو مزید تباہی اور بربادی ہوگی۔ نیشنل پارٹی کے صدر اور پونم کے مرکزی نائب صدر ڈاکٹر عبدالحئی بلوچ نے کہا کہ فراڈ الیکشن کے بائیکاٹ کا یہ پہلا جلسہ منعقد کرکے آپ لوگوں نے بائیکاٹ کے حق میں فیصلہ دے دیا ہے۔ پشتون بلوچ عوام نے انگریز استعمار سے لیکر آج کے ظالم و جابر حکمرانوں کے خلاف حق کی آواز بلند کی ہے اور ہم حقوق کے حصول کیلئے جدوجہد سے کسی صورت دستبردار نہیں ہوں گے قربانی کا وقت آپہنچا ہے اور ایک مرتبہ پھر بلوچستان کے غیور پشتون بلوچ عوام ثابت کریں گے کہ8جنوری کو پولنگ اسٹیشن ویران ہوں گے اور کسی نے زورزبردستی ووٹ ڈالنے کی کوشش کی تو مزاحمت کا سامنا کرنا پڑے گا۔ بی این پی کے قائم مقام صدر ڈاکٹر جہانزیب جمالدینی نے کہا کہ جب بھی ظلم و جبر اور زیادتی کا بازار گرم ہوتا ہے تو عوام اپنے حقوق کیلئے اٹھ کھڑے ہوتے ہیں، یہاں کے پشتون اور بلوچ عوام نے متحد ہوکر جدوجہد کا آغاز کیا ہے اور8جنوری کو الیکشن کا بائیکاٹ کرکے حکومت کی پالیسیوں پر عدم اعتماد ثابت کردیں گے۔ انہوں نے کہا کہ اس صورتحال میں الیکشن میں حصہ لینا قوم سے غداری کے مترادف ہوگا۔

__________________