درجہ بندی: (1 votes - 5.00 average)

عدم تحفظ کے شکار پاکستانی ایک کھرب 80ارب روپے سے زائد سرمایہ ملائشیا منتقل کرچکے

کراچی (رپورٹ سہیل افضل) ملائشیا سیکنڈ ہوم پروگرام کے تحت گزشتہ 8/ سال میں پاکستانی ایک کھرب 80/ ارب روپے سے زیادہ کا سرمایہ ملائشیا منتقل کرچکے ہیں اس بات کا ا نکشاف بدھ کو ملائشین قونصل جنرل کی بریفنگ کے دوران ہوا،دریں اثناء قونصل جنرل برائے پاکستان خالد عبدالرزاق نے بدھ کو اپنے آفس میں میڈیا بریفنگ کے دوران انہوں کہا کہ ملائیشیا نے مائی سیکنڈ ہوم پروگرام (MM2H) کے نام سے 2002ء میں ایک پروگرام شروع کیا تھا جس کے تحت 50/ سال سے کم عمر کے افراد کیلئے 3/ لاکھ ڈالر ملائیشیا منتقل کرنے / بینک اکاؤنٹ میں رکھنے پر 10/ سال تک ملائیشیا میں رہائش کے ساتھ دیگر سہولتیں دینے کی پیشکش کی گئی ہے، اس پروگرام کا رسپانس بہت اچھا رہا، پاکستان دنیا کے پہلے 10/ ممالک میں شامل ہے جنہوں نے اس پروگرام میں دلچسپی لی ہے اور اب تک پاکستان سے تقریباً 700/ پاکستانی پروگرام کا حصہ بن چکے ہیں۔ ملائشین قونصل جنرل کا کہنا تھا کہ اس پروگرام کا حصہ بننے و الوں کی اکثریت کا تعلق کراچی سے ہے، ملائشین قونصل جنرل کی بریفنگ کی روشنی میں ہم نے پاکستانی کرنسی کے حساب سے جائزہ لیا تو یہ بات سامنے آئی کہ 2002ء سے اب تک ملائیشیا منتقل کئے جانے والے سرمائے کی مالیت ایک کھرب 80/ ارب روپے سے زیادہ بنتی ہے اس صورتحال سے یہ بھی پتہ چلتا ہے کہ پاکستانی خصوصاً اہل کراچی اپنے وطن میں عدم تحفظ کا شکار ہیں اور وہ کسی بھی حادثے کی صورت میں اپنے لئے متبادل انتظام کرکے رکھنا چاہتے ہیں۔ یہاں یہ بات بتانا بھی ضروری ہے کہ ملائشین قونصل جنرل نے یہ بات کسی منفی تناظر میں نہیں بتائی بلکہ ان کا موقف تھا کہ پاکستان مغربی ممالک کی نسبت اسلامی ملک کو ترجیح دے، انہوں نے پاکستان کو 2/ کھرب ڈالر کی حلال فوڈ مارکیٹ میں حصہ لینے کی بھی دعوت دی اور کہا کہ تھائی لینڈ مسلم ملک نہیں مگر حلال مارکیٹ میں نمایاں حصہ ہے، خالد عبدالرزاق نے کہا کہ پاکستان میں دنیا بھر کے سیاحوں کیلئے بڑے پرکشش مقامات ہیں مگر سیاحت سے پاکستان فائدہ نہیں اٹھا رہا، ملائیشیا نے گزشتہ سال سیاحت سے 14.5 ارب ڈالر کا زرمبادلہ حاصل کیا ہے۔ ملائیشیا کی کل آبادی 27/ ملین ہے جبکہ 2010ء میں یہاں آنے والوں کی تعداد 24.5 ملین رہی ہے ملائشین قونصل جنرل جو کہ اپنی مدت ختم ہونے کے بعد اسی ماہ پاکستان سے جدہ جارہے ہیں انہوں نے پاکستان کے بارے میں بڑے اچھے جذبات کا اظہار کرتے ہوئے کہا کہ ان کی خواہش ہے کہ پاکستان اپنے وسائل اور صلاحیت سے فائدہ اٹھا کر ترقی یافتہ ممالک کی صف میں شامل ہو۔