زلزلہ کے دوران کشمیر یونیورسٹی کی دو زخمی طالبات بربریت کا شکار


آٹھ اکتوبر دوہزار پانچ کے زلزلے کے دوران کشمیر یونیورسٹی کی زخمی طالبات کا تاحال کوئی پتہ نہیں چل سکا والدین انصاف کے حصول کیلئے دربدر کی ٹھوکریں کھا کھا کر تھک گئے' وزیراعظم آزاد کشمیر بھی بچیوں کو بازیاب کرانے میں ناکام ہوگئے' لاپتہ بچیاں پاکستان میں گروہ کی قید میں ہیں' گروہ کے چار ملزمان کی گرفتاری کے باوجود مذکورہ طالبات کی برآمدگی کیلئے کوئی اقدامات نہیں کئے گئے' والدین نے بچیوں کی بازیابی کیلئے ایم کیو ایم کے قائد الطاف حسین سے مددکی اپیل کی جس پر الطاف حسین نے فوری کارروائی کا حکم دیدیا ہے۔ آٹھ اکتوبردوہزار پانچ کے قیامت خیز زلزلہ کے دورانکشمیر یونیورسٹی مظفرآباد میں زیر تعلیم دو طالبات ظہیرہ خاتون دختر محمد غفور خان سٹوڈنٹ ایم ایس سی کیمسٹری ساکن دہاڑہ تحصیل روالاکوٹ،عذرا شریف دختر محمد شریف خان سٹوڈنٹ ایم ایس سی بیا لوجی سکنہ سون ٹوپہ تحصیل روالاکوٹ ضلع پونچھ زخمی ہوگئیں جنہیں راولپنڈی منتقل کیا گیا لیکن تاحال وہ لاپتہ ہیں۔ ا ن بچیوں کے والدین میں امید کی کرن اس وقت پیدا ہوئی جب ڈسٹرکٹ باغ سے تعلق رکھنے والی بچی فوزیہ اشرف چونڈہ (سیالکوٹ)سے بازیاب ہوگئی۔ اور اس بچی نے مذکورہ دونوں طالبات کی تصدیق کی کہ اس نے اُنہیں اس نیٹ ورک کے تحت مجبوری میں کام کرنے والی لڑکیوں میں دیکھا ہے فوزیہ اشرف نے ان بچیوں کی تصاویر دیکھ کرتصدیق کردی ۔ دس نومبر دوہزار سات کو ایک لڑکی ظہیرہ دختر محمد غفور نے اپنے کسی عزیز کو فون پر بتایا کہ وہ ظہیرہ بول رہی ہے۔ اسکے بعد اس کے ہاتھ سے کسی نے فون چھین لیا۔ بعد ازاں جب اس مو بائیل کوٹریس کیا گیا تو یہ نمبر بہاولنگر کا تھا۔ دونوں گمشدہ بچیوں کے ورثاء نے اس بابت وزیر اعظم آزادکشمیر سردار عتیق احمد خان کو درخواست دی مگر اس درخواست پر کوئی عمل درآمد نہ ہو سکا۔ اور گمشدہ بچیوں کے والدین کا تجسس بڑھ گیا۔ آخر کار اُنہوں نے متحدہ قومی موومنٹکشمیر کے پارلیمانی لیڈر محمد طاہر کھوکھر کی وساطت سے ایم کیو ایم کے قائد الطاف حسین بذریعہ درخواست مدد مانگی کہ ہماری بچیوں کی بازیابی کیلئے کردار ادا کیا جائے۔ اُدھر بازیاب ہونے والی کشمیری لڑکی فوزیہ اشرف کو جب تھانہ آر اے بازار راولپنڈی کے اے ایس آئی محمد صدیق نے لڑکے کے بھائی سے پندرہ ہزار روپے رشوت طلب کر کے چونڈہ سے برآمد کیا تو لڑکی والدین کے سپرد کرنے کی بجائے عدالت میں پیش کر کے اسکا ایک سو چوسٹھ کا بیان ریکارڈ کرا کے لڑکی کو ایک وکیل زاہد انور ایڈووکیٹ کی سپرداری میں دے دیا گیا۔ جہاں لڑکی کے ساتھ بربریت کا کھیل جاری رہا ۔ فوزیہ اشرف کو اغوا کرنے اور اڈہ چلانے کے دھندہ میں ملوث نائیکہ رفعت بی بی تاحال گرفتار نہیں ہو سکی۔ جبکہ ضمانت پر رہا ہونے والی دوسری نائیکہ شازیہ عرف تاج کا خاوند اشتہاری بتایا جاتا ہے۔ ادھر آزادکشمیر یونیورسٹی کی دو بچیوں کی بازیابی کیلئے ایم کیو ایم کے قائد الطاف حسین نے ہدایات جاری کر دی ہیں۔ آزادکشمیر کے عوامی وسماجی حلقوں نے مطالبہ کیا ہے کہ آٹھ اکتوبر دوہزار پانچ کے زلزلہ میں گم ہونے والی دیگر بچیوں کی بازیابی کیلئے اقدامات کئے جائیں۔