روایات میں آتا ہے کہ حضورصلی اللہ علیہ وسلم کے وصال مبارک کے تقریباً دس یوم بعد ایک اعرابی بیابان سے چل کر مسجد نبوی صلی اللہ علیہ وسلم کے دروازے پر آیا ،
اس نے اپنا چہر ہ چھپایا ہوا تھا یعنی چہرہ پر نقاب ڈالا ہوا تھا ۔ صحابہ کرام رضی اللہ تعالی عنہ جو وہاں پر موجود تھے ان کو سلام کیا اور حضورصلی اللہ علیہ وسلم کے وصال مبارک پر غم کا اظہار کرنے کے بعد پوچھا کہ تم میں سے رسول کریم صلی اللہ علیہ وسلم کے وصی کو ن ہیں ؟ حضرت ابو بکر نے حضرت علی کی طرف اشارہ کیا ۔ چنانچہ وہ حضرت علی کی طرف متوجہ ہوا اور حضرت علی کو سلام کیا حضرت علی نے جواب میں فرمایا وعلیکم السلام یا مضر ۔ یہ جواب سن کر حضرت ابو بکر صدیق اور دیگر صحابہ رضی اللہ عنہم بہت حیران ہوئے ۔ اعرابی نے کہا ، آپ کو میرا نام کیسے معلوم ہوا ؟ حضرت علی نے فرمایا ، مجھے رسول اللہ صلی اللہ علیہ وسلم نے خبر دی ہے اور تمہارے حال کی کیفیت مجھے دکھائی ہے اگر تم چاہتے ہو کہ حضورصلی اللہ علیہ وسلم سے جو کچھ تمہارے بارے میں سنا تم سے بیان کروں؟اعرابی نے کہا آپ کا نام کیا ہے ؟ آپ نے فرمایا علی بن ابی طالب اور میں رسول اللہ صلی اللہ علیہ وسلم کا چچا زاد بھائی ہوں ۔ اعرابی نے کہا ، الحمد للہ ۔
اسکے بعد حضرت علی رضی اللہ تعالی عنہ نے فرمایا ، تم عرب کے ایک مرد ہو تمہارا نام مضر ہے ، تم نے اپنی قوم کو رسول کریم صلی اللہ علیہ وسلم کی بعثت کی خبر دی تھی اور حضورصلی اللہ علیہ وسلم کے اوصاف جمیلہ میں تم نے قوم کو یہ کہا کہ تہامہ میں ایک آدمی کھڑا ہوگا جس کے رخسار چاند سے زیادہ منور ، گفتگو شہد سے زیادہ میٹھی ہوگی ۔ جو شخص اس کی پیروی کرے گا نجات حاصل کر لے گا مساکین اور یتامی کا والی ہوگا ۔ خچر پر سوار ہوگا ۔ اپنے جوتے کو خود پیوند لگائے گا ، شراب نوشی اور زنا کو حرام قرار دیگا ۔ ناحق قتل اور سود سے منع کرے گا ،خاتم الانبیاء ہوگا ۔ وہ نماز پنجگانہ کی ادائیگی کریں گے اور رمضان المبارک کے روزے رکھیں گے ۔ حج بیت اللہ کریں گے ۔ اے گر وہ ! ان پر ایمان لے آؤ اور اس کی تصدیق کرو ۔ جب تم نے اس امر کی طرف انہیں رہنمائی کی تو انہوں نے تیرے ساتھ ظلم و ستم کا سلوک کیا اور تجھے قید میں ڈال دیا ۔ پھر جب حضورصلی اللہ علیہ وسلم کا وصال ہوگیا اور تیری قوم کو سیلاب سے ہلاک کر دیا گیا اور تجھے قید خانہ سے خلاصی حاصل ہوئی اس کے بعد تیرے کانوں میں غیب سے یہ ندا آئی کہ اے مضر ! بلاشبہ محمد صلی اللہ علیہ والہ وسلم کا وصال ہوگیا اور تو ان کے صحابہ کرام رضی اللہ عنہ میں سے ہے ۔ مدینہ منورہ کی طرف جا اور ان کے روضہ انور کی زیارت کر ۔ تو منازل طے کرتا ہوا اب یہاں پر آن پہنچا ہے ۔
اعرابی نے جب یہ ساری باتیں سنیں تو اس کی آنکھوں سے آنسو جاری ہوگئے اور کہا اے علی رضی اللہ عنہ آپ کو اس واقعہ کی خبر کیسے ہوگئی ۔ حضرت علی نے فرمایا مجھے حضورصلی اللہ علیہ وسلم نے خبر دی ہے اور فرمایا کہ میرے وصال کے بعد مضر میری قبر پر آئے گا تم جب اس سے ملوتو میرا سلام اسے پہنچا دینا ۔مضر نے جب حضورصلی اللہ علیہ وسلم کے سلام کی خوشخبری سنی تو خوشی سے آگے بڑھ کر حضرت علی کے سر مبارک کو بوسہ دیا ۔ اس کے بعد اس نے حضرت علی سے کہا میں نے آپ سے کچھ سوال کرنے ہیں ،آپ مجھے ان سوالوں کے جوابات دیں ۔
حضرت علی رضی اللہ عنہ نے فرمایا کہ تم سوال کرو ۔ چنانچہ مضر نے کہا ، اے علی وہ کون سا نر ہے جس کا باپ اور ماں نہیں ؟وہ کون سی مادہ ہے جو بغیر ماں باپ کے موجود ہوئی ہو؟ ایسا رسول جو نہ جن ہو نہ انسان اور نہ ہی فرشتوں میں سے ہو چوپایوں اور درندوں میں سے بھی نہ ہو ؟ ایسی قبر جس نے قبر والے کو اپنے ساتھ سیر کرائی ہو؟ ایسا حیوان جس نے اپنے ساتھیوں کو ڈرایا ہو ؟ ایسا جسم جس نے ایک بار کھایا پھر کبھی نہیں؟زمین کا ایسا حصہ جہاں ایک مرتبہ سورج چمکا اور پھر آج تک نہیں چمکا اور قیامت تک نہیں چمکے گا ؟ایسا پتھر جس سے زندہ پیدائش ہوئی ؟وہ عورت جس سے تین ساعت میں لڑکے کی ولادت ہوئی؟ دو ساکن جو حرکت نہیں کرتے ؟ دو متحرک جو ساکن نہیں ہوتے ؟ د و دوست جو دشمن نہیں ہوتے ؟دو دشمن جو دوست نہیں ہوتے ؟ شے کیا ہی؟ لا شے کیا ہی؟رحم مادر میں سب سے پہلے کس اعضاء کی شکل بنتی ہے ؟قبر میں سب سے آخر میں کون سی چیز فنا ہوتی ہے ؟