ہارون رشید نے جب مسجد نبوی کی زیارت کی نیت سے مدینہ منورہ کا سفر کیا تو اس کی نگاہ امام مالک پر پڑی جو مسند تدریس پر جلوہ افروز تھے۔ وہ امام مالک کے پاس آیا اور کہنے لگا: امام مالک! میری خواہش ہے کہ میں بھی علم حاصل کروں، کیا آپ کے لیے ممکن ہے کہ میرے گھر تشریف لائیں اور ہمیں علم سکھائیں۔
امام مالک: ہارون! علم کسی کے پاس خود چل کر نہیں جاتا بلکہ علم کے خوگر خود ہی اپنی تشنگی بجھانے کے لیے چشمہ ہائے علم کی طرف لپکتے ہیں
ہارون رشید: سچ فرمایا آپ نے اے امام دار الھجرۃ! میں عنقریب مسجد نبوی کے اندر آپ کی خدمت میں زانوئے تلمذ تہ کروں گا۔
امام مالک: ہارون رشید! اگر آپ کی تشریف آوری میں تاخیر ہوئی تو پھر مسجد کے اندر موجود طالبان علمِ نبوت کی گردنیں پھلانگ کر آگے بیٹھنے کی اجازت نہ ہو گی۔
ہارون رشید: امام صاحب! آپ کا حکم سر آنکھوں پر۔
امام مالک اگلے دن نمازِ عصر کے بعد درس دے رہے تھے کہ آپ کی نگاہ ہارون رشید پر پڑی جو مسجد کے اندر موجود کرسی پر بیٹھا ہوا تھا۔ یہ دیکھ کر آپ کے کلام کا انداز بدل گیا اور فرمایا: رسول اکرم صلی اللہ علیہ وعلی آلہ وسلم کا ارشاد ہے:
من تواضع للہ رفعہ اللہ۔ ۔[۱]
جو اللہ کے لیے تواضع و انکساری اختیار کرتا ہے اللہ تعالیٰ اسے بلندی و رفعت عطا کرتے ہیں
ہارون رشید اشارہ سمجھ گیا اور کرسی ہٹانے کا حکم دیا، پھر زمین پر دوسرے شاگردوں کے ساتھ بیٹھ گیا۔
اس کے بعد امام مالک کی خدمت میں حاضر ہوا اور آپ کی پیشانی کو بوسہ دے کر چار سو دینار کا تحفہ پیش کیا۔
امام مالک نے فرمایا: امیر المومنین! میری معذرت قبول کریں، میں صدقے کا مستحق نہیں ہوں اور نہ ہی ہدیہ قبول کرتا ہوں
ہارون رشید: آخر ہدیہ قبول کرنے میں حرج کیا ہے؟ جبکہ نبی کریم صلی اللہ علیہ و علی آلہ وسلم نے ہدیہ قبول فرمایا ہے۔
امام مالک: میں کوئی نبی نہیں ہوں۔
چنانچہ امام مالک نے وہ دینار نہایت احترام کے ساتھ خلیفہ کو واپس کر دیے۔ (واضح رہے کہ شریعت میں ہدیہ قبول کرنا درست ہے مگر اہل علم و تقویٰ حکام کے تحائف سے ہمیشہ اس لیے دامن کشاں رہے ہیں کہ ان کا مال عام طور پر ظلم کے نتیجہ میں حاصل ہوتا۔ نیز یہ کلمہ حق کی ادائیگی میں رکاوٹ بنتا ہے)۔
اب ہارون رشید اس بات پر بضد ہوا کہ امام صاحب بغداد کا دورہ کریں، جو ان دنوں خلافت عباسیہ کا دار الخلافہ تھا اور علمی مرکز بھی تھا۔ مگر امام صاحب نے اسے کی دعوت کو بھی یہ کہہ کر مسترد کر دیا کہ:
اللہ کی قسم! میں رسول اللہ صلی اللہ علیہ وعلی آلہ وسلم کی ہمسائیگی کو چھوڑ کر کسی دوسری جگہ کی زیارت نہیں کر سکتا
[right]حوالہ جات:
[۱] سلسلۃ الاحادیث الصحیحۃ حدیث نمبر ۲۳۲۸ ۔
(سنہرے اوراق نامی کتاب سے ماخوذ)
[/LEFT]