حضرت عائشہ رضی اﷲ عنہا فرماتی ہیں کہ ہم اپنے کسی سفر میں تھے بیدا یا ذات الجیش میرا ہار ٹوٹ کر کہیں گرپڑا. جس کے ڈھونڈنے کیلئے حضور اکرم صلی اﷲ علیہ وسلم مع قافلہ ٹھہر گئے . اب نہ تو ہمارے پاس پانی تھا اور نہ ہی اس میں کسی جگہ . اتنے میں نماز کا وقت آگیا . اب لوگ آکر میرے والد حضرت ابوبکر صدیق رضی اﷲ عنہ کے پاس میری شکایتیں کرنے لگے. دیکھ ہم ان کی وجہ سے کس مصیبت میں پڑگئے ہیں. چنانچہ میرے والد صاحب میرے پاس آئے . اس وقت رسول اﷲ صلی اﷲ علیہ وسلم میری ران پراپنا سر مبارک رکھ کر سو رہے تھے. آتے ہی بڑے غصے سے مجھے کہنے لگے : عائشہ ! تو نے حضور صلی اﷲ علیہ وسلم کو اور لوگوں کو روک دیا. اب نہ تو ان کے پاس پانی ہے اور نہ یہاں کہیں پانی نظر آتا ہے. الغرض مجھے خوب ڈانٹا اور اﷲ جانے کیا کیا کہا اور میرے پہلو میں اپنے ہاتھ سے کچو کے بھی مارے. لیکن میں نے ذرا سی بھی جنبش نہ کی کہ کہیں رسول اﷲ صلی اﷲ علیہ وسلم کے آرام میں خلل واقع نہ ہو. اب ساری رات گزر گئی . صبح کو لوگ جاگے . لیکن پانی نہ تھا تو اﷲ تعالیٰ نے تیمم کی آیت نازل فرمائی اور سب نے تیمم کیا اور نماز ادا کی. حضرت اسید بن حضیر رضی اﷲ عنہ کہنے لگے : اے ابو بکر رضی اﷲ عنہ کے گھر والو! یہ کوئی تمہاری پہلی ہی برکت تو نہیں. اب جب ہم نے اس اونٹ کو اٹھایا جس پر میں سوار تھی ، تو اس کے نیچے سے ہی میرا ہار مل گیا.

( بخاری، مسند احمد)
( ''صحیح اسلامی واقعات ''، صفحہ نمبر 151-150)

__________________