اموی خلیفہ مروان بن حکم کے سامنے ارویٰ بنت اویس نامی ایک خاتون نے سعید بن زید رضی اﷲ تعالیٰ عنہ پر مقدمہ دائر کیا، کہ انہوں نےارویٰ کی زمین کے ایک ٹکڑے پر ناجائز قبضہ کرلیا ہے۔ سعید بن زیدؓ رضی اللہ عنہ اُن دس صحابہ میں شامل ہیں، جن کےلئے اُن لوگوں کی زندگی میں نبی اکرم صلی اﷲ علیہ وسلم نے جنتی ہونے کی بشارت دی تھی، اس لئے یہ لوگ عشرہ مبشرہ کہلاتے ہیں۔ ارویٰ کا مقدمہ مروان کے سامنے پیش ہوا۔ انہوں نے سعیدؓ کو بلایا۔ یہ اُس وقت تک خاصے ضعیف ہوچکے تھے۔ بہرحال وہ تشریف لائے۔ جب انہیں الزام کے بارے میں بتایا گیا تو انہوں نے کہا، میں اس کی زمین پر کیسے قبضہ کرسکتا ہوں جبکہ میں گواہی دیتا ہوں کہ میں نے اﷲ کے رسول صلی اﷲ علیہ وسلم سے خود سنا ہے۔ مروان نے پوچھا ”اے صحابی رسول! آپ بتایئے آپ نے کیا سنا ہے؟“ سعید نے کہا، حضور صلی اﷲ علیہ وسلم نے ارشاد فرمایا ”جس شخص نے کسی کی بالشت برابر زمین پر بھی ظلم سے قبضہ کیا تو قیامت کے دن ساتوں زمینوں کو طوق بناکر اس کے گلے میں ڈال دیا جائے گا۔“ مروان نے کہا ”اس حدیث کو سننے کے بعد کسی دلیل، گواہ یا حجت کی کوئی ضرورت نہیں۔ مقدمہ خارج کردیا اور فیصلہ دیا کہ سعیدؓ پر ناجائز مقدمہ بنایا گیا ہے جس کی کوئی اصل نہیں ہے۔“ بہرحال اس جھوٹے مقدمے سے سعیدؓ جیسے جید صحابی کو ناقابل بیان ذہنی اذیت پہنچی۔ عمر کے اس حصے میں ان کی اہانت ہوئی تھی چنانچہ انہوں نے اپنے ہاتھوں کو آسمانوں کی طرف اٹھاکر فرمایا۔ ”اے اﷲ! اگر یہ عورت جھوٹی ہے تو اس کو اندھا کردے اور اس کو اس زمین میں ہلاک کردے۔“ سعیدؓ کی بد دعا پوری ہوئی اور مرنے سے پہلے ارویٰ اندھی ہوگئی اور ایک دن اپنی زمین میں گھومتے ہوئے اچانک ایک گڑھے میں گر کر مرگئی۔
(سنہرے فیصلے، عبدالمالک مجاہد دارالسلام)