اسلام علیکم معزز قارئین کرام !
آج ہی پاک نیٹ پر ایک دھاگا سیدنا صدیق اکبر رضی اللہ عنہ کی شان میں بطور کوئز پروگرام کہ لگایا گیا کہ جس میں ایک سوال کہ جواب نے مجھے چونکا دیا جب دھاگا میں صدیق اکبر رضی اللہ عنہ کہ قرآنی لقب کی بابت سوال کیا گیا تو ابتداء قریبا سبھی حصہ داروں نے صدیق بتلایا یہ درست ہے کہ صدیق آپ رضی اللہ کا مشھور لقب ہے اور یہ آسمانی لقب بھی ہے جیسا کہ احادیث مبارکہ سے واضح ہے مگر یہ قرآنی لقب نہیں بلکہ ٹیکنیکلی یہ احادیث سے ثابت شدہ لقب ہے جبکہ صدیق اکبر رضی اللہ عنہ کا قرآنی لقب ثانی اثنین ہے مگر مجھے شدید تعجب ہوا جب احباب میں سے کسی ایک نے بھی اس طرف توجہ نہیں فرمائی سو میں نے ضروری سمجھا کہ سیدنا صدیق اکبر کی اس شان کو قرآن و حدیث اور تاریخ کہ حوالہ سے بیان کروں دعا ہے کہ اللہ پاک حق کہنے حق لکھنے اور حق سمجھنے کی توفیق دے آمین ۔

قرآن پاک کی سورہ توبہ کی آیہ 40 میں ارشاد باری تعالٰی ہے ۔۔

إِلاَّ تَنصُرُوهُ فَقَدْ نَصَرَهُ ٱللَّهُ إِذْ أَخْرَجَهُ ٱلَّذِينَ كَفَرُواْ ثَانِيَ ٱثْنَيْنِ إِذْ هُمَا فِي ٱلْغَارِ إِذْ يَقُولُ لِصَاحِبِهِ لاَ تَحْزَنْ إِنَّ ٱللَّهَ مَعَنَا فَأَنزَلَ ٱللَّهُ سَكِينَتَهُ عَلَيْهِ وَأَيَّدَهُ بِجُنُودٍ لَّمْ تَرَوْهَا وَجَعَلَ كَلِمَةَ ٱلَّذِينَ كَفَرُواْ ٱلسُّفْلَىٰ وَكَلِمَةُ ٱللَّهِ هِيَ ٱلْعُلْيَا وَٱللَّهُ عَزِيزٌ حَكِيمٌ ﴿۴۰﴾
ترجمہ علامہ غلام رسول سعیدی مد ظلہ العالی
اگر تم رسول کی مدد نہ کی تو بیشک اللّٰہ ان کی مدد کرچکا ہے جب کافروں نے انکو بے وطن کردیا تھا در آں حالیکہ وہ دو میں سے دوسرے تھے جب وہ دونوں غار میں تھے جب وہ اپنے صاحب سے فرمارہے تھے غم نہ کرو بیشک اللہ ہمارے ساتھ ہے سو اللّٰہ نے ان پر طمانیت قلب نازل کی اور انکی ایسے لشکروں سے مدد فرمائی جنکو تم نے نہیں دیکھا اور کافروں کی بات کو نیچا کردیا اور اللّٰہ کا دین ہی بلند و بالا ہے، اور اللّٰہ بہت غلبہ والا بڑی حکمت والا ہے
تفسیر :-
صاحب تفسیر مطہری رقمطراز ہیں کہ :- یعنی اگر تم رسول صلی اللہ علیہ وسلم کی مدد نہیں کرو گے تو اللہ انکی تائید کرئے گا جیسا کہ اس نے اس وقت فرمائی تھی جب کفار نے آپ صلی اللہ علیہ وسلم کو مکہ سے نکالا تھا در آں حالیکہ آپ صلی اللہ علیہ وسلم دو میں سے دوسرے تھے ۔ثانی اثنین ، نصرہ کی ضمیر منصوب سے حال (واقع) ہونے کی وجہ سے منصوب ہے یعنی اللہ پاک نے مدد فرمائی در آں حالیکہ آپ صلی اللہ علیہ وسلم کہ ساتھ صرف ایک شخص تھا اور وہ حضرت ابوبکر رضی اللہ عنہ تھے اور وہی دوسرے تھے ۔
صاحب تفسیر نعیمی رقمطراز ہیں کہ :- ثانی اثنین یہ فرمان عالی اخرجہ کی ضمیر سے حال ہے ثانی کے معنی ہیں دوسرا یعنی دو میں سے ایک نہ کہ دوسرے درجے والا اس سے مراد حضور صلی اللہ علیہ وسلم ہیں اور اثنین سے مراد حضور انور صلی اللہ علیہ وسلم اور صدیق اکبر دونوں ہیں یعنی حضور اس حال میں وہاں سے روانہ ہوئے تھے کہ جب آپ صرف دو ہی تھے یعنی آپ صلی اللہ علیہ وسلم اور صدیق اکبر ۔۔۔۔ اور پھر نکتہ کہ تحت رقمطراز ہیں کہ ۔ ۔
اہم نکتہ :- جب عدد کہ اسم فاعل کی نسبت اپنے برابر والے عدد کی طرف ہوتو ویاں درجہ مراد نہیں ہوتا بلکہ اس میں سے ایک مراد ہوتا ہے جیسے ثانی اثنین ، ثالث ثلثہ، رابع اربعہ وغیرہ اور اگر اپنے سے اونچے والے عدد کی طرف نسبت ہو تو مراد درجہ ہوتا ہے جیسے رابع خمسہ یعنی پانچ میں سے چوتھا لہذا ثانی اثنین میں اگر حضور دو میں سے دوسرے ہوئے تو صدیق اکبر بھی دو میں سے دوسرے ہوئے ۔
تفسیر در منثور میں ہے کہ ۔۔۔

وأخرج ابن عدي وابن عساكر من طريق الزهري عن أنس رضي الله عنه " أن رسول الله صلى الله عليه وسلم قال لحسان رضي الله عنه: هل قلت في أبي بكر شيئاً؟ قال: نعم. قال: قل وأنا أسمع. فقال: "
وثاني اثنين في الغار المنيف وقد طاف العدوّ به إذ صاعد الجبلا
وكان حب رسول الله قد علموا من البرية لم يعدل به رجلا

" فضحك رسول الله صلى الله عليه وسلم حتى بدت نواجذه، ثم قال: صدقت يا حسان، هو كما قلت ۔
مفھوم :-
ابن عدی اور ابن عساکر نے امام زھری کہ طریق سے عن انس رضی اللہ عنہ روایت کیا ہے کہ حضور انور صلی اللہ علیہ وسلم نے حسان رضی اللہ عنہ سے فرمایا کہ کیا تم نے ابوبکر کی شان میں بھی کچھ کہا ہے ؟ انھوں نے عرض کی جی ہاں ، حضور صلی اللہ علیہ وسلم نے فرمایا کہ کہو ہم سنیں گے ۔
تو انھوں نے عرض کی :
ثانی اثنین بلند غار میں تھے اور وہ پہاڑ میں اس حال میں چڑھے کہ دشمن ان کہ اردگرد گھوم رہا تھا اور دنیا جانتی ہے کہ رسول صلی اللہ علیہ وسلم کو ان سے محبت تھی در ایں حالیکہ کوئی بھی انکا ہمسر نہیں ۔

پس رسول صلی اللہ علیہ وسلم نے تبسم فرمایا یہاں تک کہ آپ کے دندان مبارک ظاہر ہوگئے پھر فرمایا کہ تم نے سچ کہا اے حسان وہ (صدیق ) ایسے ہی ہیں جیسا کہ تم نے کہا ۔۔

صاحب تفسیر کبیر امام رازی علیہ رحمہ رقمطراز ہیں کہ :-
أنه تعالى سماه { ثَانِيَ ٱثْنَيْنِ } فجعل ثاني محمد عليه السلام حال كونهما في الغار، والعلماء أثبتوا أنه رضي الله عنه كان ثاني محمد في أكثر المناصب الدينية، فإنه صلى الله عليه وسلم لما أرسل إلى الخلق وعرض الإسلام على أبي بكر آمن أبو بكر، ثم ذهب وعرض الإسلام على طلحة والزبير وعثمان بن عفان وجماعة آخرين من أجلة الصحابة رضي الله تعالى عنهم، والكل آمنوا على يديه، ثم إنه جاء بهم إلى رسول الله صلى الله عليه وسلم بعد أيام قلائل، فكان هو رضي الله عنه { ثَانِيَ ٱثْنَيْنِ } في الدعوة إلى الله وأيضاً كلما وقف رسول الله صلى الله عليه وسلم في غزوة، كان أبو بكر رضي الله عنه يقف في خدمته ولا يفارقه، فكان ثاني اثنين في مجلسه، ولما مرض رسول الله صلى الله عليه وسلم قام مقامه في إمامة الناس في الصلاة فكان ثاني اثنين، ولما توفي دفن بجنبه، فكان ثاني اثنين هناك أيضاً ۔ ۔ ۔ ۔
مفھوم :-
اللہ پاک نے آپ رضی اللہ عنہ کو ثانی کا اسم عطا فرمایا اور آپ کو ثانی محمد صلی اللہ علیہ وسلم قرار دیا اس حال میں کہ آپ غار میں انکے ساتھ تھے اور علماء نے اس آیت سے ثابت کیا ہے کہ صدیق اکبر اکثر دینی مناصب میں ثانی رسول تھے جب رسول صلی اللہ علیہ وسلم نے انھے اسلام کی دعوت دی تو انھوں نے بلا تردد اسلام قبول کرلیا اور یوں پھر صدیق اکبر نے طلحة ،زبیر و عثمان بن عفان اور اجلہ صحابہ کی ایک عظیم جماعت کو اسلام کی دعوت دی اور ان سب نے بھی آپ رضی اللہ عنہ کہ ہاتھ پر اسلام قبول کیا اس طرح صدیق اکبر دعوت دینے میں حضور کہ ثانی ہوئے اسی طرح تمام غزوات میں شریک ہوئے اور ہمیشہ ساتھ رہے کبھی جدا نہ ہوئے سو اس طرح سے بھی حضور کہ ثانی اور اسی طرح جب حضور پرنور شافع یوم النشور صلی اللہ علیہ وسلم جب بیمار ہوئے تو امامت کے لیے صدیق اکبر کو چنا سو مصلٰی رسول پر بھی آپ ہی ثانی قرار پائے اور جب وفات پائی صدیق اکبر نے تو انکا مدفن بھی حضور کہ پہلو میں بنا سو اس اعتبار سے بھی ثانی اثنین اسی طرح اور کئی مقامات پر بھی ۔ ۔

لہذا ثابت ہوا کہ صدیقِ اکبر رضی اللہ عنہ کو قرآن مجید میں ثانی اثنین فرمایا گیا ہے۔ اللہ تبارک وتعالیٰ کے کلام میں کسی دوسرے کو ثانی رسول نہیں بتایا گیا۔ نبی کریم صلی اللہ علیہ وآلہ وسلم نے ابوبکر رضی اللہ عنہ کو ہی سب سے پہلے حج اسلام کا سردار’’امیر الحج‘‘بنایا۔ نبی صلی اللہ علیہ وآلہ وسلم نے ابوبکر رضی اللہ عنہ ہی کو سب سے آخری غزوہ تبوک میں سب سے بڑی فوج کا سپہ سالار بنایا۔ نبی صلی اللہ علیہ وآلہ وسلم نے اپنی موجودگی میں حضرت ابوبکر رضی اللہ عنہ کو امام بنایا اور صحابہ میں صرف وہی ہیں جو خلیفہ رسول اللہ کے خطاب سے مخاطب ہوئے۔ دیگر خلفائے راشدین’’امیر المؤمنین‘‘ کے لقب سے مخاطب کیے جاتے تھے۔ ان سب واقعات کی وجہ یہی ہے کہ ابوبکر رضی اللہ عنہ ’’صدیق‘‘ تھے اور صدیق ہی نبی اللہ سے قریب تر ہوتا ہے۔
والسلام

__________________
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔
پیکرِ دلرُبا بن کے‌ آیا ،روحِ ارض و سما بن کے آیا
سب رسولِ خُدا بن کے آئے ،وہ حبیبِ خُدا بن کے آٰیا