::::::: میں اُس سے کیسے سوال کروں ؟ :::::::

السلام علیکم و رحمۃ اللہ و برکاتہ ،
آخرت کی فِکر کے بارے میں ایک دو مضامین تیار کرنے کے لیے مختلف کتب کا مطالعہ کرتے کرتے چند واقعات دل پر بہت اثر پذیر ہوئے ، اُن میں سے ایک پیش خدمت ہے ، او بلا تبصرہ پیش خدمت ہے ۔
۔۔۔۔۔۔۔۔۔۔۔۔۔۔۔۔۔۔۔۔
ایک دفعہ ھشام بن عبدالملک اپنی خلافت کے زمانے میں حج کے لیے گیا ، جب وہ کعبہ میں داخل ہوا تو وہاں دوسرے بلا فصل خلیفہ ، امیر المؤمنین عُمر رضی اللہ عنہُ کے پوتے سالم رحمہُ اللہ بن عبداللہ رضی اللہ عنہ ُ موجود تھے، تو خلیفہ ہشام نے اُن سے کہا ،
""" اے سالم مجھ سے اپنی کسی ضرورت کا سوال کیجیے """
سالم رحمہُ اللہ نے جواب دیا """ مجھے اللہ سے حیاء آتی ہے کہ میں اُس کے گھر میں کسی اور سے سوال کروں """
جب سالم رحمہُ اللہ کعبہ سے باہر نکلے تو خلیفہ ہشام بن عبدالملک اُن کے پیچھے چلے اور اُن سے کہا """اب آپ اللہ کے گھر سے نکل آئے ہیں ، لہذا اب مجھ سے اپنی کسی ضرورت کے لیے سوال کیجیے """
سالم رحمہُ اللہ نے فرمایا """ دُنیا کی ضروریات کے بارے میں سوال کروں یا آخرت کی ضروریات کے بارے میں ؟ """
خلیفہ ہشام بن عبدالملک نے کہا """دُنیا کی ضروریات میں سے """
سالم رحمہُ اللہ نے فرمایا """ میں نے تو اُس سے دُنیا کی ضروریات کے بارے میں کبھی کوئی سوال نہیں کیا جو دُنیا کا مالک ہے تو اُس سے کیسے سوال کروں جو دُنیا کی ملکیت نہیں رکھتا """
بحوالہ "صفۃ الصفوۃ /جلد۲/صفحہ91"

__________________
اب نہ ہو گا کہیں کوئی نزول کتاب ::: بند کر دیا رب العالمین نے یہ باب
ہے جو بھی صحیح سنت رسالت مآب ::: بے شک ہے وحیء رب الارباب