وجدان

بھارت میں شیروں کی تعداد سے متعلق جاری ایک نئے سروے کے مطابق ملک میں شیروں کی تعداد کم ہوکر آدھی رہ گئي ہے۔
نیشنل ٹائیگر پریزور آتھارٹی کے سیکریٹری راجیش گوپال کا کہنا ہے کہ سنہ 2002 کی گنتی میں شیروں کی مکمنہ تعداد پینتیس سو بتائي گئی تھی۔ لیکن تازہ گنتی (سروے) کے مطابق بھارت میں صرف چودہ سو گيارہ شیر رہ گئے ہیں۔

حکومت نےاعتراف کیا ہےکہ سابقہ اعداد و شمار درست نہیں تھے۔

راجیش گوپال کا کہنا ہے کہ شیروں کی گنتی کے لیے نیا طریقہ اپنایا گیا تھا۔ پچھلی بار پیروں کے نشان کے مطابق ان کی تعداد متعین کی گئی تھی جس میں غلطی کی گنجائش تھی۔

ان کا کہنا تھاکہ ’بھارت میں شیر ملک کی سترہ ریاستوں میں صرف شیروں کے لیے تحفظ مقامات (ریزو ) پر ہی پائے جاتے ہیں۔‘

منگل کو مرکزي حکومت کی طرف سے جاری اعداد و شمار کے مطابق مدھیہ پردیش میں 300، اتراکھنڈ میں 178، اتر پردیش میں 109، مہارشٹر میں 103، آندھراپردیش میں 95 ، اڑیسہ میں 45، راجستھان میں 32 اور بہار میں دس شیر ہونے کا اندازہ ہے۔

شیروں کی تعداد میں واقع ہونے والی کمی کے باعث حکومت نے تین سال قبل ایک ٹاسک فورس کی تشکیل دی تھی اور نامور ماحولیاتی سائنس دان سونیتا نارائن کو اس کا سربراہ بنایا گيا تھا۔

کم ہوتے شیروں کی تعداد کی وجہ غیر قانونی شکار اور کم ہوتے جنگلات کو مانا جاتا ہے۔گزشتہ کچھ برسوں میں شیروں کے تحفظ کے لیے بعض اقدام کئے گئے لیکن وہ ناکافی ثابت ہوئے ہیں اور شیروں کی تعداد مسلسل کم ہورہی ہے۔

خیال کیا جاتا ہےکہ گزشتہ پانچ سالوں میں چار سو سے زیادہ شیر لاپتہ ہوئے ہیں۔ایک اندازے کے مطابق ایک صدی قبل بھارت میں تقریباً چالیس ہزار شیر پائے جاتے تھے۔

یہ سروے بین الاقوامی تنقیدکاروں کی تنقید کے بعد کیا گیا ہے جنہوں نے بھارت پرالزام عائد کیا تھا کہ وہ شیروں کی تعداد میں کمی کے مسئلے سے صحیح طور پر نہیں نمٹ رہا ہے۔

nsa47

شیر کیا کرنے ہیں آج کا دور لومڑیون کا ہے