وجدان

ماہرین کا کہنا ہے کہ جانوروں کی کئی قسموں کے ناپید ہونے سبب ماحول کے بجائے انسان ہو سکتا ہے۔
بین الاقوامی سائنسدانوں کی ایک ٹیم کا کہنا ہے کہ ہو سکتا ہے کہ آسٹریلیا کے علاقے تسمانیہ میں قدیم زمانے سے پائے جانے والے بڑے بڑے جانور درجہِ حرارت کی تبدیلی کے بجائے انسانی شکار کی وجہ سے معدوم ہو گئے ہوں۔

سائنسدانوں کا خیال ہے کہ ہو سکتا ہے یہ یہ سلسلہ برطانیہ سمیت دنیا کے دیگر حصوں میں وقوع پذیر ہوا ہو۔

یہ بات امریکی سائنسی مجلے ’پروسیڈنگز آف دی نیشنل اکیڈمی‘ میں شائع ہونے والی ایک رپورٹ میں کہی گئی ہے۔

سائنسدان کئی سالوں سے جانوروں کی مختلف قسموں کے صفحہِ ہستی سے مٹ جانے پر بحث کرتے آ رہے ہیں۔ سب سے زیادہ بحث اس بات پر ہوتی رہی کہ آسٹریلیا میں پائے جانے والے بڑے بڑے جانور کیسے ناپید ہو گئے۔

آسٹریلیا کے علاقے تسمانیہ میں انسان کی آمد تقریباً تینتالیس ہزار سال پہلے اس وقت ہوئی جب یہ جزیرہ عارضی طور پر زمین کے ایک ٹکڑے کے ذریعے آسٹریلیا کے وسیع علاقے سے منسلک ہو گیا۔

اب تک یہ سوچا جاتا رہا کہ انسانی کی آمد سے بڑے سائز کی کئی نسلیں ناپید ہو چکی تھیں۔

لیکن برطانوی اور آسٹریلوی سائنسدانوں کا کہنا ہے کہ جدید ریڈیو کاربن اور نورپاشی جیسی تیکنیک کو بروئے کار لا کر وہ ان بڑے بڑے جانوروں کے فوصل کی شکل اختیار کرنے والے باقیات کا بہتر طور پر تجزیہ کر سکتے ہیں اور ان کی صحیح عمر کا اندازہ لگا سکتے ہیں۔

اس تحقیق کے دوران ان سائنسدانوں کے مشاہدے میں یہ بات آئی کہ ان بڑے بڑے جانوروں میں سے کئی انسانوں کی آمد کے دو ہزار سال بعد تک زندہ رہے اور یہ ایک ایسے وقت ہوا جب ماحول میں کوئی ڈرامائی تبدیلیاں بھی نہیں ہو رہی تھیں۔

اس سے سائنسدان اس نتیجے پر پہنچے کہ جانوروں کی ان نسلوں کے ناپید ہونے میں شکار کا بہت بڑا کردار ہے۔