یہ سوال اکثر پوچھا جاتا ہے کہ امریکی کالجوں اور یونی ورسٹیوں میں کون سی ڈگریاں جاری کی جاتی ہیں اور غیر ملکی طلبا کو ان میں سے کون سی ڈگریاں منتخب کرنی چاہیئیں۔

اعلیٰ تعلیم کے امریکی اداروں میں مختلف شعبوں میں ڈگریاں جاری کی جاتی ہیں۔ کمیونٹی کالجوں میں دو سال کی عمومی تعلیم کے بعدایسو سی ایٹ ڈگری دی جاتی ہے۔ اس کے بعد طالبِ علم چاہے تو اسی تعلیم کو کسی کالج یا یونی ورسٹی میں دو مزید سال تک جاری رکھ کر بیچلر ڈگری حاصل کر سکتاہے۔

اس کے علاوہ انڈر گریجویٹ طالبِ علم چار سالہ کالج یا سکول میں داخلہ لے کر بھی بیچلر ڈگری حاصل کر سکتے ہیں۔ سائنس پڑھنے والے طلبا کو بیچلر آف سائنس کی ڈگری ملتی ہے، جسے BS بھی کہا جاتا ہے۔ آرٹس یا ہیومینٹیز (تاریخ، فلسفہ، زبانیں، ادب، سماجی علوم، وغیرہ) پڑھنے والے طلبا کی ڈگری بیچلر آف آرٹس یا BA کہلاتی ہے۔

بیچلر ڈگری کےبعد دو یا تین سال تک مزید پڑھ کر ماسٹرز ڈگری حاصل کر سکتے ہیں۔ بہت سے امریکی دن کو کام کرکے شام کی کلاسوں میں داخلہ لے کر ماسٹر ز کی ڈگری حاصل کرتے ہیں۔ اس قسم کی ڈگری کی ایک مثال ایم بی اے کی ڈگری ہے جو بزنس ایڈمنسٹریشن کی ماسٹرز کی ڈگری ہے۔ اس شعبے کے طلبا مختلف قسم کی کمپنیوں میں کام کر کے پڑھائی کے ساتھ ساتھ تجربہ بھی حاصل کرتے ہیں، اور تعلیم مکمل کرتے ہی مختلف قسم کے اداروں میں کام کرنے کے لیے تیار ہوتے ہیں۔

ایم بی اے کی ڈگری کے لیے اکنامکس، فنانس اور مارکیٹنگ کی تعلیم دی جاتی ہے۔ اس کے علاوہ تجارتی اداروں کی ساخت اور کام کرنے کے طریقوں کے بارے میں بھی پڑھایا جاتا ہے۔

امریکہ آنے والے بیشتر طلبا کا مرغوب ترین مضمون بزنس ہوتا ہے۔ اس شعبے میں داخلہ لینے کے لیے ضروری ہے کہ غیر ملکی طلبا کے پاس بیچلرز کی ڈگری ہواور اس کے علاوہ ٹوفل میں اچھے نمبر حاصل کر رکھے ہوں۔

کئی یونی ورسٹیاں جی میٹ (Graduate Management Admission Test) کا امتحان بھی مانگتی ہیں۔ دنیا بھر کے تقریباً اٹھارہ سو ایم بی اے پروگراموں میں داخلے کے لیے جی میٹ دینا لازمی ہے۔

گریجویٹ مینجمنٹ ایڈمشن کونسل کا کہنا ہے کہ غیر ملکی طلبا کو چاہیئے کہ وہ ایسے تعلیمی اداروں کا انتخاب کریں جو انھیں تعلیم مکمل کرنے کے بعد نوکری حاصل کرنے میں مدد دے سکیں۔

مختلف کمپنیوں کے نمائندے یونی ورسٹیاں کا دورہ کرتے رہتے ہیں اور نمایاں کارکردگی کا مظاہرہ کرنے والے طلبا کو وہیں نوکری دے دیتےہیں۔

تاہم غیر ملکی طلبا کومقامی طلبا کے مقابلے میں نوکری حاصل کرنے میں دشواری کا سامنا کرنا پڑ تا ہے اور صرف نہایت عمدہ تعلیمی ریکارڈ والے طلبا ہی کو نوکری کی پیش کش کی جاتی ہے۔

__________________