9 جولائی کا دن قریب آ رہا ہے۔ اس روز دنیا کے نقشے پر موجود براعظم افریقہ کا رقبے کے لحاظ سے سب سے بڑا اور عالم اسلام کا اس لحاظ سے دوسرا بڑا ملک ٹوٹ جائے گا اور دنیا میں ایک نئی عیسائی ریاست ''جنوبی سوڈان'' کے نام سے معرض وجود میں آ جائے گی۔ سال رواں کے ماہ جنوری میں اس کے لئے باقاعدہ ریفرنڈم ہو چکا ہے جس میں 98.83 لوگوں نے ''آزادی'' کے حق میں ووٹ ڈال دیا ہے۔ سوڈان کے صدر عمرالبشیر نے نتائج کو تسلیم کر لیا اور اب ساری دنیا کو 9 جولائی کا انتظار ہے۔
ریفرنڈم کے نتائج کا اعلان ہوا تو ہماری دلچسپی بڑھ چکی تھی۔ ہم جنوبی سوڈان پہنچنے کے لئے بے تاب تھے۔ اسلام آباد سے دبئی پہنچے تو ہماری اگلی منزل سوڈان کا دارالحکومت خرطوم تھی۔ پاکستان سے سوڈان ہی نہیں براعظم افریقہ کے کسی ملک کے لئے براہ راست پرواز نہیں۔ کسی دور میں کئی افریقی ممالک کے لئے پروازیں ہوتی تھیں لیکن اب سبھی ممالک میں جانے سے پہلے دبئی جانا پڑتا ہے یہاں سے آپ تقریباً دنیا کے ہر ملک میں جا سکتے ہیں۔ دبئی سے خرطوم اترنے کے بعد ہم نے وہاں بینک سے رقم نکلوانے کا ارادہ کیا کیونکہ آگے ہماری جو منزل تھی اس کا کسی حد تک اندازہ تو تھا کہ وہاں کیا بیت سکتی ہے، لہٰذا سب سے پہلے بنک جانا پڑا لیکن جو کچھ ہمارے ساتھ بنک میں ہوا اس نے تو ہوش ہی اڑا کر رکھ دیئے کیونکہ ایسا سست، نکما، کاہل اور ہڈ حرام بنک عملہ ہمیں دنیا کے کئی ممالک کا دورہ کرنے کے باوجود آج تک کبھی نہیں ملا تھا۔ یہاں رقم نکلوانے والے صبح سویرے ہی آ کر بینکوں کے باہر ڈیرے ڈالے ہوئے تھے کیونکہ وہ تو سب کچھ جانتے تھے اور ہم ناواقف تھے۔ بینک کے باہر پہنچ کر ہمیں جلد ٹوکن مل گیا لیکن جناب کیشئرز ایسے کمال تھے کہ ایک شخص کو اس کا کیش دینے میں کم از کم پونا گھنٹہ لگا دیتے تھے۔ کبھی حال احوال پوچھا جا رہا ہے، کبھی دوستوں سے گپ شپ، کبھی فون پر ہنسی مذاق اور لوگ جناب سارا دن پیسے نکلوانے کے لئے کھڑے ہیں۔ ہمیں کئی گھنٹے کھڑا رہنے کے بعد بتایا گیا کہ جناب وقت ختم ہو چکا ہے لہٰذا اب آپ کل تشریف لایئے یہ سن کر تو ہماری سٹی گم ہو گئی۔ ہمارے بینکوں میں تو سینکڑوں لوگوں کو بآسانی بھگتا لیا جاتا ہے اور یہاں چند درجن لوگ اور ان میں سے بھی بہت سے خالی ہاتھ واپس جا رہے ہیں۔ مایوسی عروج پر تھی لیکن کرکچھ نہ سکتے تھے۔ اب ایک رات مزید خرطوم میں ٹھہرنا تھا اور وہ بھی صرف اور صرف پیسے نکلوانے کے لئے۔ اگلے روز ہم سب سے پہلے بینک کے باہر کھڑے تھے۔ آدھ پون گھنٹے کی مشقت کے بعد جتنے زیادہ پیسے ممکن تھے وہ نکلوا لئے تاکہ اب اس امتحان کا دوبارہ سامنا نہ کرنا پڑے لیکن جس خطے میں جا رہے تھے وہاں لوٹ مار، چوری، ڈکیتی کا بھی شدید خوف لاحق تھا۔ اب مرتے کیا نہ کرتے کی کیفیت تھی۔ اللہ اللہ کر کے یہاں سے خلاصی ہوئی تو دوبارہ خرطوم ایئر پورٹ کا رخ کیا اور جنوبی سوڈان کے دارالحکومت ''جوبا'' کی ٹکٹ خرید کر جہاز میں سوار ہو گئے۔
خرطوم ایک جدید شہر تھا۔ بہترین سڑکیں، بلند عمارتیں اور چمکتی دمکتی گاڑیاں (اس کا ذکر آگے چل کر کریں گے) لیکن جو منظر ''جوبا'' کا تھا وہ تو انتہائی عجیب و غریب تھا۔ آسمان سے جہاز نیچے اترنا شروع ہوا تو یوں لگا جیسے کسی ایسے علاقے میں جا رہے ہیں جو دور دور گھروں اور چھوٹی چھوٹی عمارتوں کی کوئی چند ہزار کی آبادی ہے لیکن جوبا ایئر پورٹ کا منظر سب سے مختلف تھا۔ جہاز سے باہر آئے تو جس طرح ہمارے ساتھ سفر کرنے والے مسافروں میں انتہائی درجے کے کالے اور گورے تھے وہی صورتحال ایئر پورٹ پر تھی۔ یہاں کالے اور گورے دونوں دیکھنے کو مل رہے تھے کیونکہ یہاں آئے یورپ اور امریکہ کے لوگ گورے تھے تو جنوبی سوڈان کے لوگ اتنے کالے کہ ہمارے قصور سے بھی باہر۔ لیکن ایئرپورٹ پر ہر طرف اقوام متحدہ، یورپی ممالک کی مختلف مغربی تنظیموں (این جی اوز) کے بڑی تعداد میں جہاز اور ہیلی کاپٹرز کھڑے تھے جن کا بیشتر عملہ بھی یورپ اور امریکہ سے تعلق رکھتا تھا۔ سامان وغیرہ لینے کے بعد ایئر پورٹ سے باہر آئے اور پھر کسی ہوٹل کی تلاش شروع کر دی لیکن اس سے پہلے ہم آپ کو جنوبی سوڈان کے دارالحکومت ''جوبا'' کا تھوڑا سا منظر دکھاتے ہیں۔
''جوبا'' چونکہ مستقبل کا دارالحکومت ہے اور مغرب اس نئے ملک کے قیام کے لئے بھرپور دلچسپی لے رہا ہے اس لئے وہ ہی اس کی تعمیر میں مصروف ہیں۔ ''جوبا'' چند سال پہلے زیادہ سے زیادہ ایک بڑے گائوں جتنا علاقہ تھا۔ لیکن اب وہاں سڑکیں اور عمارتیں بنائی جا رہی ہیں اور گزشتہ چھ سال (چھ سال سے مراد وہ عرصہ ہے جب شمالی سوڈان نے جنوبی سوڈان کے باغی رہنمائوں سے امن مذاکرات کئے اور چھ سال بعد ریفرنڈم کا وعدہ کیا تھا) سے وہاں پر تعمیراتی کام جاری ہے۔ اقوام متحدہ کا ذیلی ادارہ یو این ڈی پی یعنی یونائیٹڈ نیشن ڈویلپمنٹ پروگرام یہاں تیزی سے تعمیر و ترقی کا کام کر رہا ہے لیکن حیران کن طور پر چھ سال میں بھی یہاں شاید سو کلو میٹر سڑکیں نہیں بن سکی ہیں۔ سوائے ''جوبا'' ایئر پورٹ کی طرف آنے والی مرکزی شاہراہ کے جو چند کلو میٹر طویل ہے کوئی بڑی سڑک دیکھنے کو نہیں ملتی۔ زیرتعمیر سڑکوں پر دھول مٹی کھاتے جس ہوٹل میں بھی قدم رکھتے تو وہاں رہائش کے نرخ معلوم کر کے ہاتھوں کے طوطے اڑ جاتے۔ کوئی ہوٹل سو ڈالر یومیہ سے کم پر کمرہ دینے کو تیار نہیں تھا اور بعض کے ریٹ تو ڈیڑھ سو سے 200 ڈالر تک تھے اور ہوٹل بھی کیسے…؟ نہ صفائی کا انتظام نہ کوئی بنیادی سہولت مہیا۔ سوائے چند بڑے ہوٹلوں کے کسی میں بجلی نہیں تو کسی میں پانی کا مکمل انتظام نہیں اور بڑے ہوٹل بھی بس نام کے ہی ہوٹل تھے کیونکہ سارے جوبا میں دو منزلہ عمارت تو مشکل سے ملتی ہے اور تین منزلہ کا تو ابھی تصور ہی نہیں۔ یہاں ہوٹلوں کے اس قدر بلند نرخ کی وجہ بعد میں سمجھ آئی کہ یہاں دنیا بھر سے آئی غیر مسلم این جی اوز نے ڈیرے جما رکھے ہیں۔ ان کے پاس بے تحاشا پیسہ ہے اور انہیں کوئی مسئلہ نہیں سو یہاں کے لوگ بھی خوب لوٹ مار میں مصروف ہیں۔ بہت سے ہوٹلوں کے مالک تو غیر ملکی بھی تھے جن کا عملہ بھی غیر ملکی تھا۔ چار و ناچار ہمیں بھی تو کہیں بالآخر رہنا ہی تھا سو ایک ''مناسب'' ہوٹل کو تلاش کیا اور ڈیرہ ڈال دیا۔ پھر اگلے مشن کی تیاری شروع کر دی۔ یعنی یہ دیکھنا کہ یہاں کیسے اتنا بڑا انقلاب آ گیا کہ 99 فیصد لوگوں نے متفقہ طور پر ووٹ ڈال کر صرف اور صرف ''آزادی'' کو پسند کیا ہے۔ یہ کیسے ہوا اور کیسے یہ سب لوگ ایک ہی بات پر متحد و متفق ہو گئے؟ ایسا ریفرنڈم تو شاید دنیا کی تاریخ میں کبھی نہیں ہوا شاید ہمارے پرویز مشرف صاحب بھی نہ کروا سکے تھے اور یہ کہ یہاں کے لوگ آخر سوڈان سے اتنے تنگ کیوں آئے ہوئے تھے۔ یہ لوگ کون ہیں اور ان کی مدد و حمایت کے لئے یورپ اور امریکہ اس قدر کیوں سرگرم عمل ہیں۔ ان کے طیارے اور ہیلی کاپٹرز کیوں قطار اندر قطار کھڑے ہیں…؟ اس کے لئے ہمیں ''جوبا'' بھی گھومنا تھا اور جنوبی سوڈان کے دیگر کئی علاقے بھی لیکن ہم تو یہ سن کر حیران رہ گئے کہ پورے جنوبی سوڈان میں اگر کوئی اچھی پختہ سڑک ہے تو وہ یہی چند کلو میٹر کا ٹکڑا ہے جو ایئر پورٹ کے ساتھ منسلک ہے وگرنہ ملک کے ایک حصہ کی چند سو کلو میٹر کی ایک سڑک کے سوا باقی کچی اور ٹوٹی پھوٹی پگڈنڈیاں ہیں۔ اس کی وجہ بھی ہمیں جلد ہی سمجھ میں آ گئی اور وہ یہ تھی کہ یہاں کے تقریباً لوگ مستقل کہیں گھر بنا کر نہیں رہتے۔ ان کی کوئی بستیاں نہیں، کوئی شہر نہیں اور زندگی گزارنے کا کوئی مستقل انداز نہیں۔ پورے جنوبی سوڈان میں مجموعی طور پر تین ایئرپورٹس ہیں۔ اقوام متحدہ مزید بنانے کا سوچ رہی ہے اور ایک دو کا کام بھی شروع کر دیا گیا ہے۔ جنوبی سوڈان کو جن صوبوں یا ریاستوں میں تقسیم کیا جائے گا اس کا حتمی اعلان نہیں ہوا لیکن چند بڑے علاقے جہاں نسبتاً چند چند ہزار کی آبادیاں ہیں انہیں ہی مختلف ریاستوں یا صوبوں کا مرکز بنا کر ملک مختلف حصوں میں تقسیم کیا جائے گا۔
''جوبا'' کی طرح ان علاقوں کا بھی انتخاب کر کے وہاں بھی ترقیاتی و تعمیراتی کام جاری ہیں اور لوگوں کو کوشش کر کے ایک منظم زندگی گزارنے کی طرف لایا جا رہا ہے لیکن اس کے باوجود تقریباً ساری آبادی ہی خانہ بدوش قسم کی ہے۔ آج یہاں تو کل وہاں اور یوں ہی یہ لوگ اپنا معمولی سامان زندگی ساتھ اٹھائے جانور ہانکتے چلتے پھرتے زندگی گزار دیتے ہیں۔
جوبا میں اس وقت جگہ جگہ ایک منزلہ اور دو منزلہ مختلف عمارتیں اور سینکڑوں پختہ گھر زیر تعمیر ہیں لیکن باقی سارے جنوبی سوڈان کی طرح یہاں بھی ایئر پورٹ کے آس پاس جنگلی بانسوں، سرکنڈں اور لکڑیوں سے بنی جھونپڑیاں ہیں جنہیں وہاں Tukul ٹوکل کہا جاتا ہے پائی جاتی ہیں۔ لوگ انہی ٹوکلوں میں رہتے ہیں، ان کی زیادہ سے زیادہ عمر دو سال کے لگ بھگ ہوتی ہے۔ اس کے بعد یہ بوسیدہ ہو کر گر جاتی ہیں اور یہ لوگ پھر سے کسی اور جگہ نئے ٹوکل بنا لیتے ہیں، انہیں بنانا بھی آسان ہوتا ہے اور ان میں رہنا بھی کیونکہ زیادہ مشکل اور مصیبت ہوتی ہی نہیں۔ جب یہ لوگ ایک جگہ سے دوسری جگہ جاتے ہیں تو عموماً پورے کا پورا قبیلہ ہی حرکت کرتا ہے اور یوں ہمارے ہاں کے پہاڑی چرواہوں کی طرح چلتے پھرتے زندگی گزار دیتے ہیں۔ ہمارے ہاں کے چرواہوں کا پھر بھی روٹ اور منزل ہوتی ہے کہ سردیوں میں گرم علاقے اور گرمیوں میں سرد علاقے اور اس کے لئے ان کا روٹ بھی مستقل ہوتا ہے لیکن یہاں کے لوگوں کا ایسا کوئی معاملہ بھی نہیں ہے کیونکہ نہ کسی کی کوئی منزل ہے اور نہ کوئی ٹھکانہ… نہ کوئی کسی زمین کا مالک ہے اور نہ کسی گھر جائیداد کا… بس سب جنگلوں، صحرائوں، وادیوں، گھاٹیوں میں چل پھر کر زندگی بسر کر رہے ہیں۔ جنوبی سوڈان پہنچ کر تو یوں لگا کہ جیسے ہم صدیوں نہیں ہزاروں سال کے کسی پرانے دور میں آ گئے ہیں۔ جس طرف نکل جائو، آپ کو سینکڑوں میل دور تک زمانہ جدید تو کیا زمانہ قدیم کی کوئی چیز نہیں ملے گی۔ نہ بجلی، نہ پانی کا نظام، نہ گیس، نہ تیل، نہ گاڑیاں، نہ ہوٹل، نہ ہسپتال، نہ سکول، بس لوگ رہ رہے ہیں۔ جانور ہانک رہے ہیں، جانوروں کا شکار کر رہے ہیں، جنگلوں سے خوراک کھا رہے ہیں۔بقول غالب
رہیے اب ایسی جگہ چل کر جہاں کوئی نہ ہو
ہمنشین کوئی نہ ہو اور ہم زباں کوئی نہ ہو
پڑیے گر بیمار تو کوئی نہ ہو تیماردار
اور اگر مر جائیے تو نوحہ خواں کوئی نہ ہو
یوں جنوبی سوڈان نے تو حیران ہی کر دیا کہ یہ بھی دنیا کا کوئی علاقہ ہے اور یہاں بھی ''انسان'' ہی بستے ہیں جنہیں دنیا کی کسی چیز کا کوئی علم نہیں۔


بشکریہ ہفت روزہ ۔۔۔۔ جرار
والسلام۔۔۔ علی اوڈ
ali oadrajput
__________

(جاری ہے)

__________________
"اگرحق کونہیں پہچان سکتے،تو باطل کےتیروں پر نظررکھو،جہاں پرلگ رہے ہوں وہی حق ہے///شیخ الاسلام،،،امام ابن تیمیہ رحمتہ اللہ علیہ. (حافظ سعید زندہ باد)